Marhay/Maraot

An mga pangyayari ngonyan bako lang sa Pilipinas kundi sa enterong kinaban marhay, maraot.

Arog baga kan isyu kun ipapadagos o dai an franquesa kan higanteng ABS-CBN.

Maraot sa mga paradalan nin teleserye orog na kan“FPJ/Ang Probinsiyano” ta mapuputol an saindang pagka-adik sa mga istoryang mayong kamanungdanan. Marhay ta an oras nyato pwede nang magamit sa hanapbuhay, pagtrabaho, paglinig sa harong, asin pag-bonding sa pamilya.

Marhay ta nagyaman asin famuso si Coco Martin pero naghahanga sana kita sa saiyang ka-gwapohan asin ka-matchohan pero dai ta man aram an tunay niyang ugali.

Maraot ta so boot nauulang ang pig-aapod na demokrasya asin “press freedom” o libreng kumunikasyon o makapagtaram o magsurat, pero marhay ta napupugol an pag-aabuso kan mga puderuso asin ibang politiko, tsismoso o paragibo nin fake news.

Maraot pati ta mapobre an pamilya Lopez, mawawaran trabaho an mga artista, asin iba pang talents pati mga trahabador kan industriya nin tv asin radyo, pero mapopondo naman an pagparabola sato kan media asin tibaad lamang makua ta na an katotohanan.

Marhay ta kun maisara an ABS-CBN mauuntok na an propaganda sa bareta, bias asin fake news asin pag-omaw sa sadiring network, pagtao nin tabang sa mga biktima nin kalamidad na hali man sana palan sa mga para-antabay, pero maraot ta baka mapondo na logod an maski anong bareta o impormasyon hali sa pribadong kompaniya kundi puro na sana bareta kan gobyerno. Ma-oontok na an paggamit nin saralang Bikol sa radyo asin telebisyon.

Dapat kaya mag-adal kitang mag-atid-atid kan mga baretang nadadangog niyato sa radyo, nadadalan sa telebisyon maski nababasa sa social media ta an madeterminar kan katotohanan kita man sana.

Marhay ta nagtuga an Bulkan Taal.

Maraot ta dakol an nawaran harong asin estada, nawaraan nin hanapbuhay, nawaran nin mga ataman na hayop asin mga pananom, may nagadan pang mga tao.

Marhay ta nakanood kitang magdangog sa gobyerno asin ibang mga ahensiya siring kan PHILVOCS, PAGASA, MDRRMC, DSWD, DOH, DILG asin iba pa. Tibaad magka-igwa nin suhay na Department of Resiliency o Desasters.

Marhay ta nakanood kitang maggamit nin maskara, maski medyo nagmahal ta grabe an demand, pero malaen ta natahuban an ka-gwapohan asin beauty kan mga Pinoy asin Pinay.

Marhay ta nakanood kitang magpangadie.

Maraot ta naglakop sa dakol na parte kan kinaban ta may nakaabot pati sa Amerika asin Europa an nakaka-ulakit na helang na COVID19 hali sa Wuhan City, Tsina (an ground zero). Dakol an nakaputan kan kamatean bako lang sa Tsina kundi pati sa sarong cruise ship sa Hapon, kadamay pa an mga Pilipinong tripulantes.

Dakol na an na quarentina sa Pilipinas asin sa abroad. Sa Pilipinas may nagadan na pero bakong Pilipino.

Haradit nang marhay an gabos na tao, takot maulakitan, gabos gustong nakasulot nin maskara, habo nang magbeso-beso pero sige an pansahot lalo na sa mga Tsino, na garo iyo na an pinakamaraot na tao.

Orog na maraot ta naapektaran an turismo asin negosyo in heneral bako lang sa Mainland Tsina, Hongkong, asin Macau kundi pati sa Pilipinas orog na sa Boracay, Bohol, Caramoan, Cagsawa Ruins asin iba pang popular na tourist destinations kan nasyon orog na ta an nagdadalaw kadaklan mga Tsino. An ibang raso nakatarakot na logod, harabo nang magdigdi sa Pilipinas ta takot maulakitan.

Apektado pati OFWs ta may travel ban. Marhay ngani ta hinali na an siring kan pagbawal sa nasyon kan Taiwan.

Marhay ta ipinagboboot na kan gobyerno ni Presidente Duterte bilang alternatibo an lokal na turismo, an pagbiyahe kan mga Pilipino sa mga tourist asin historic distinations digdi sa laog kan Pilipinas, sa Luzon, Visayas asin Mindanao embis sa ibang parte kan kinaban gastuson an satuyang kwarta sa pagbiyahe.

An marhay lang kaini asin magayon ta nakanood kitang maglinig sa hawak, pirmeng maghanaw nin kamot, magtahob nin nguso kun nag-aabo asin nag babahon, magmantenir nin malinig na kapalibutan, magkakan nin tama asin mag-ehersisyo.

An maraot ta sa esfuersos kan gobyerno maguin sa Taal o sa isyu kan COVID19 an pirme pang basol an gobyerno. Pero an marhay ta an gobyerno sige sanang trabaho.

Marhay/maraot ta igwang Presidenteng Digong, marhay/maraot ta may PresidenteTrump sa Amerika, Presidente Xi sa Tsina, Presidente Putim sa Rusya marhay/maraot ta may opposisyong Liberal asin Yellowtards sa Pilipinas, may Democratic Party asin Republikan Party (GOP) sa Amerika, may Rappler, Inquirer, Star, Tribune, Manila Times, CNN, Fox News, New York Times, Washington Post asin iba pa.

Marhay/maraot ta nagka-igwa nin tariff war an USA asin Tsina, marhay ta may Silk Road na programa an mga Intsik, marhay ta may fake news ta sa ibong na lado naglataw an totoong bareta, nababalad pati an mga putikon asin mga propagandista kan magka-ibong na lado na an tuyo sana ulaon an paksiw sa satuyang pagbuhay sa ibabaw kan kinaban.

An pinakamarhay ta igwa nin Diyos na iyo an naggibo sato gabos, nagtatao nin marhay na pasabong tangaring magaya-gaya an buhay sa ibabaw kan kinaban.