2,314 mga orig ginadan huli sa ASF

March 5, 2020

Pili, Camarines Sur – Nagabot na sa 2,314 na ataman nin orig an ginadan o pig-depopulate  sa Camarines Sur kan ‘‘deadly squad group’’ puon na magbungkaras an African Swine Fever (ASF) sa banwaan nin Bombon, nagbalyo sa Calabanga asin sa Magarao alagad dai pa kabali digdi an bilang sa Ciudad nin Naga na  igwa nang casong ASF an nagkaperang ataman na hayop sa duwang barangay. 


Sa pinakahuring datus kan Marso 3, 2020 hali sa opisina ni Emily Bordado, regional information officer kan Departamento de Agricultura (DA) sa Bicol sa Bombon igwa nang 1,508, Calabanga – 708, asin sa Magarao 100.


An mga pig-depopulate na orig tolos man piglubong sa mga designadong lugar base sa proceso na pinapasunod kan National Meat Inspection Service (NMIS) nganing dai na maglakop an virus sa pagtaraid na barangay asin banwaan.


  Sinabi pa kan DA na igwa nang 412 farm an apektado sa 14 mga barangay kan tolong banwaan.


Sa Ciudad nin Naga na pigkumfirmar ni DA regional director Rodel Tornilla ki Alcalde Nelson Legacion kan Marso 1 an mga barangay na apektado iyo an Barangay Pacol asin Cararayan.


Sa report ni City Agriculturist Edna Bongalonta sa sesyon regular kan Martes sa Sangguniang Panlungsod, sinabi kaini na maabot sa 900 na orig an nasa listahan ninda na dapat garadanon sa duwang apektadong barangay.


Kun ibabali na an gagadanon na orig sa ciudad na na yaon sa laog kan 1 kilometer radius maabot na sa 3,214 an total na pig-depopulate.


Tolos man nag-implementar an City Hall nin locked down sa duwang barangay asin katorce diyas man na suspendido an pagbuno nin orig sa slaughter house kan ciudad sa barangay Del Rosario. 


An DA mataong ayuda sa backyard hog raiser nin P5,000 cada gagadanon na orig asin dugang na P3,000 hali sa Capitolyo Provincial.


An Provincial Disaster Risk Reduction Management Council estricto nang pigbabawal an paglaog asin pagpaluwas nin buhay na orig asin nagbugtak na nin mga animal checkpoint sa duwang municipalidad.


Sa National Economic Development Authority (NEDA) sa Bicol, sinabi ni regional Director Agnes Tolentino na apektado an economia sa rehiyon kun padagos na maglakop an ASF.                            (dpa)

Share on Facebook
Share on Twitter
Please reload