Road widening project sa Magsaysay Ave. nagsikad na

March 5, 2020

Pigpuponan na kan 3rd Camarines Sur Engineering District kan Department of Public Works and Highways (DPWH) an patrabajo kan road widening project sa Magsaysay Avenue alagad si mga ulang na estractura siring kan mga poste kan Casureco II asin telcos igwa nang coordinasyon an City Hall nganing magtarabangan na mahali an ulang sa sakop kan road right of way.


Si Alcalde Nelson Legacion nagpahayag sa Bicol Mail na igwa nang ginibong coordinasyon sa saiyang opisina an opisyales kan DPWH asin construction firm mala ngani nagpupuon na an patrabajo sa may rotunda sa laog kan Magsaysay Ave.


An proyecto nagcacantidad nin P20 milyon puon sa may Magsaysay Bridge sundo sa rotunda sakop kan Barangay Concepcion Grande na mapahiwas kan presenting lakbang kan tinampo na igwa doce metros asin gigibohon nang veinte metros base sa pigsumiter na program of work kan DPWH.


 Sinabi pa ni Legacion an pigpaaram sana sa saiya iyo an pagpalakbang sa tinampo kan Magsaysay Avenue alagad dai pa kabali an pagpalakbang kan Magsaysay Bridge. 


 Napag-araman kan BM na an opisina rehiyonal kan DPWH sa Bicol iyo an ma-implementar kan Magsaysay Bridge asin an proyecto nagcacantidad nin P60 milyones.


Dinagdag pa kan jefe ejecutivo kan ciudad na huli ta mag-ibong sana kan gilid kan tinampo an papalakbangon dai man apektado an bulos kan trafico.


Sa ngonian naghihinanapos na an road widening  project sa M.T. Villanueva Ave. (dating Liboton St.) kasumpay na tinampo pasiring sa Magsaysay Ave.


Si Assistant District Engr. Richard Emmanuel Ragragio kan 3rd CamSur Engineering District nagsabi an proyecto dapat na-implementar kan 2019 budget alagad huli ta ginuntingan nin fondo an saindang 3rd Engineering District iginilid an implementasyon asin ngonian idadagos man giraray.


Naisubasta na kan 2019 asin dagos na an implementasyon ngonian na taon.


Na-igilid an implementasyon kan proyecto kan 2019 matapos kaltasan nin dakulang fondo sa infrastrastruta an 3rd Congressional District sa Camarines Sur ni Congresista Gabby Bordado hali sa dating P1.2 bilyon kan 2018 budget alagad ginibo na sanang P326 milyones.


Si Bordado, bakong kaalyado kan administrasyon ni Presidente Duterte asin sa ngonian siya assistant minority leader.  (dpa)
 

Share on Facebook
Share on Twitter
Please reload