HULI SA ASF: City Hall nagdeclara nin state of calamity

Nagdeclara nin state of calamity an lokal na gobierno kan Ciudad nin Naga epekto kan african swine fever alagad sa duwa sanang itaas na barangay kan ciudad.

An barangay Pacol asin Cararayan iyo sana an declarado sa estado nin calamidad kasunod kan kahagadan ni Alcalde Nelson Legacion sa Sangguniang Panlungsod nganing magamit an fondo sa calamity fund na itatabang sa mga apektadong backyard hog raiser.

Sa sesyon regular kan SP kan Martes, Marso 3 sa paagi nin joint and collection motion inaprobaran an resolucion nganing kuanan nin fondo sa itataong ayuda kan City Hall sa mga may origan sa duwang barangay na kabali sa pupuhoon o gagaradanon na orig na yaon sa laog kan ‘’one kilometer radius’’.

Pigkakarkulo na maabot sa 700 na ataman na orig an pupuhoon base sa inisyal na bilang kan City Veterinarian na sakop kan ‘’one kilometer radius’’.

Base sa resolucion an ciudad matao nin tabang finansyal na tres mil pesos sa bados na orig, dos mil pesos sa anayon asin on mil pesos para sa ugbon alagad limitado sana sa veinteng payo.

Ini afuera kan itataong cinco mil pesos hali sa Department of Agriculture (DA) na dai kabali sa saindang fondo an dugang na ayuda para sa ugbon na orig. Limitado man sa veinteng payo an babayadan kan ahencia sa cada hog raiser.

Sa press conference sa opisina ni Alcalde Nelson Legacion sinabi kan jefe ejecutivo pinaabot sa saiya ni DA regional director Rodel Tornilla kan Marso 1 na positivo si orig sa Zona 7 kan barangay Cararayan asin Zona 5 kan barangay Pacol na pigkuanan nin sample asin dinara sa laborartoryo kan Bureau of Animal and Industry sa Ciudad nin Quezon.

Kabali sa mga naging aksyon kan City Hall iyo an pag-implementar kan katorce diyas na locked down sa pagbuno nin orig sa slaughter house sa barangay del Rosario alagad dai kabali an damulag asin baka.

Nagpapasunod na kan checkpoint sa duwang barangay nganing mayong iluwas na buhay man o karning orig hali sa duwang barangay. (dpa)