Ranches bagong RD kan LTO

March 12, 2020

Kultura ng Kaligtasan sa Kalsada advocia kan direktor

Turnover ceremony sa bagong direktor rehiyonal kan LTO Bicol hali ki Direktor Noreen Bernadette San Luis-Lutey (sa wala) pasiring ki Francisco Ranches, Jr. (sa too) sa tahaw si Asec Edgar Galvante.  (dpa)

 

 

Nag-asumir na an bagong direktor rehiyonal kan Land Transportation Office (LTO) sa Bicol sa ginibong turn over ceremony kan Martes, Marso 10 alagad igwa man nin sadiring advocacia para sa seguridad kan mga tsuper asin ini inapod niyang Kaltura ng Kaligtasan sa Kalsada (KKSK).


Si Francisco Ranches, Jr. dating assistant regional director kan LTO sa rehiyon IV-A nagpahayag sa miembros kan media na dakul an mga pagbabago kan saindang ahencia na saiyang iimplementar sa pag-isyu  nin licencia sa pagmanijo alagad ini para sa seguridad kan tsuper asin kan publiko asin itutulod niya sa Bicol an KKSK.


Saiyang niribayan si Director Noreen Bernadette San Luis-Lutey na madedestino na sa Region IV-A.


Dati-dati pacil an pagkua nin student permit dikit sana an mga rekisitos alagad saindang ipapasunod ngonian an memorandum circular kan ahencia na dapat mag-agi muna sinda sa quince diyas na theoretical training, sabi pa ni Ranches.


Saiyang pigtawan nin duon na  an pagkua nin licencia sa magmanijo bakong deretso kan sarong namamanuan envez pribiliyo na dapat estrictong sunodon an mga rekisitos nganing maseguro an saindang pagmanijo para sa road safety.


Sinabi pa ni Ranches na maagi sa due process an arin man pigrereclamong tsuper na nagbalga sa trafico alagad kun nasa tama saiyang ibabasura an reclamo.


An formal na turn over ceremony ginibo sa Avenue Plaza sa Magsaysay Avenue, Ciudad nin Naga na presente si Assistant Secretary Edgar Galvante kan opisina central sa Land Transportation Office.


Sa pagpa-aram ni Lutey sa atubangan kan mga opisyales kan LTO sa Bicol asin mga bisita saiyang pigbiklad an mga acomplisimiento asin mga onra na saiyang nakua sa laog nin walong taon bilang pamayo kan ahencia sa rehiyon cinco.


Sa mensaje man ni Raches, pigcierto kaini na ipapadagos niya an programa na ‘’Students Today, Road Users Tomorrow (STRUTT)’’ na na-establiser ni Lutey kan 2014 asin nagpapadagos sagcod sa ngonian.


An  programa sa STRUTT katuwang kan LTO an Departmento de Edukasyon nganing matukdoan an mga estudiantes kan mga leyes asin reglamento kan LTO, nganing matukdoan sinda na maging responsable bilang ‘’road users’’.


Saro ini sa mga legacia kan dating direktor kan LTO Bicol na pigpunan digdi sa rehiyon cinco asin pig-aadaptar naman sa ibang rehiyon.


An bagong LTO director dating bise alcalde kan Ciudad nin Vigan, pignombrahan bilang pamayo kan ahencia sa sa Region IV-A kan panahon ni dating Presidente Benigno Aquino III.   (dpa)

Share on Facebook
Share on Twitter
Please reload