Pagbuelta kan viaje kan PNR sa Ciudad nin Legazpi, iginilid

Puedeng ipadagos an viaje kan tren kan Philippine National Railways (PNR) haling Ciudad nin Naga sundo sa Ciudad nin Legazpi alagad magdedefende sa saindang opisina central.

Enot nang pigplano na ibubuelta an commuter train kan nakaaging taon alagad sa ngonian mayo nang kasegurohan.

Tinugotan sana an an pagpadagos kan commuter train na viajeng Naga PNR Station hasta sa Sipocot, Camarines Sur.

Si PNR Supervisor Greg Maño nagpahayag sa Bicol Mail na dikit sana man an dapat pakarhayon sa linya kan perokaril haling Camarines Sur sagcod sa Albay alagad kaipuhan an fondo para sa rehabilitasyon.

An dalagan kan tren cada viaje digdi inaabot nin 60 hasta 70 kilometro per ora.

Dati nang nagbuelta an viaje pasiring sa Ciudad nin Legazpi kan panahon ni Presidente Noynoy Aquino alagad kulang an regular na pasajeros mantang dakulang competencia an bus asin van.

Kaipuhan sana an ‘’justification’’ asin an kahagadan kan publiko kun dapat buhayon giraray an viaje alagad sa presente mayong anuncio an saindang opisina central, sabi pa.

Abot sa 105 kilometros an distancia kan PNR Naga sagcod sa PNR Legazpi asin duwang oras asin may treinta minutos an viaje.

Sa ngonian mantenido kan perokarril an commuter train sa Camarines Sur na haros aroaldaw pano nin pasajeros an saindang kotse alagad perming break even an saindang ingreso huli ta barato an flete.

An piglalaoman na total rehabilitation kan PNR hali sa P175 bilyon na inutang sa China, dugay na asin ginigibo pa an bagong desinyo kan Chinese construction firm. (dpa)