EPEKTO KAN LOCKED DOWN: DSWD suporta sana sa relief goods sa brgy

Ciudad nin Legazpi. An opisina rehiyonal kan Department of Social Welfare and Development (DSWD) nagpahayag na preparado sinda na magpaluwas nin relief goods sa mga apektadong residentes kan barangay mantang pig-iimplementar an locked down huli sa epekto kan padagos na pagkuriyat kan coronavirus (Covid-19), alagad pig-linaw kan ahencia na sinda sana an augmentation support.

Ini an piglinaw ni regional director Arnel Garcia kasunod kan direktiva ni Presidente Rodrigo Duterte na kaipuhan magtabang sinda nin ayuda oras na magkulang-kulang an pagkakan sa mga residentes kan barangay huli sa epekto kan coronavirus sa tahaw kan pig-iimplementar na locked down.

Si Duterte nagdeclara na nin enhanced community quarantine sa enterong Luzon kasunod kan saiyang enot na pagdeclara sa enterong nasyon sa state of public health emergency.

An mga lokal na gobierno iyo man giraray an may dakulang responsabilidad sa saindang konstituentes asin an DSWD yaon sana sa augmentation support, sabi pa.

Sinabi pa ni director Garcia na saindang tatabangan si mga tios na familia mantang si mga mayayaman an nag-panic buying sa groceria sa mga mall.

An saindang suplay sa pagkakan itatao sa LGUs kun ini kinakaipuhan na iyo man an madistribuer kan relief goods.

An mga barangay officials saro man sa pigpatanidan ni Duterte na dai pabayaan an saindang residentes asin dapat maging regular an saindang pag-monitor sa apektado kan Covid-19.

Alagad an ibang mga barangay councils nagpahayag man na kulang an saindang fondo orog na kun gagamiton an calamity fund. (dpa)