Nagtatrabajo sa Cavite nagpuli sa CSur gamit an bisekleta

BISEKLETA VIAJENG BICOL. Sa kawaran nin pampasajerong bus huli kan enhanced community quarantine si Fernando Aureus, residente kan Libmanan, Camarines Sur nagpapahingalo sa Bondoc, Peninsula sa saiyang pagbisekleta haling Cavite papuli sa Camarines Sur.

Sarong Bicolano na nagtatrabajo sa pabrika sa Carmona, Cavite an napiritan na magbisekleta nin duwang aldaw ngani sanang makapuli sa saiyang familia sa Poblacion, Libmanan, Camarines Sur.

Paralisado an transportasyon huli kan enhanced community quarantine sa Luzon, si Fernando Aureus, 53 anyos nakaantos makapuli sa saiyang familia gamit an mountain bike na naghali sa Carmona, Cavite alas 12:20 nin udto kan Sabado, Marso 21 pag-abot sa Calamba, Laguna nagribay nin mountain bike na sinubli niya sa saiyang pamangkin nganing maseguro na dai magpalyar an saiyang enot na gamit.

Nagpahingalo sana sa Atimunan, Quezon nganing magkakan asin mag-inum nin tubig, alagad kan siya mag-tulak liwat igwang naherak na pick-up na vehiculo nganing palunadon asin nakatipid siya nin pagpidal nin anom na kilometros kan siya pababaon.

Alas 12:00 nin udto nakilunad sa sarong truck, liwat nagpadagos sa pagbisekleta.

Pag-abot sa Candelaria, alas 7:00 nin banggui nagpundo nganing dai abuton nin curfew hour asin nakiturog sana sa check point kan barangay.

Inabutan niya man sa Atimunan an sarong nagbibisekleta, na pupuli man sa Irosin, Sorsogon.

Nagpadagos hale sa Lopez, Quezon sagcod na nakaabot sa Tabungon, Del Gallego, Camarines Sur, alagad sinundo siya digdi kan rescue team kan LGU Libmanan nganing palunadon sa dump truck na nakapuli sa saiyang residencia alas diez nin banggui, aldaw nin Domingo (Marso 22).

Si Fernando, tugang kan dating taga media na si Ms Tena Aureus nasa katorce diyas na home quarantine.