Sektor nin transporte gutom sa locked down

March 26, 2020

Aroaldaw magugutom an sektor nin transporte kun ipapadagos kan gobierno an locked down epekto kan pagkuriyat sa casong coronavirus (Covid-19) sagcod na bawalan sinda na magkayod na iyo an saindang kinabubuhay sa familia.      


Sa premiro pa semang  implementasyon kan locked down sa Ciudad nin Naga asin sa iba pang provincia sa Kabikolan apektado na an pagbuhay kan saindang familia orog na kun nag-aasa sana sa pagkayod.


Ini an mga pahayag ni Joel Pillogo, lider kan Condor-Piston sa Bicol alagad saindang piglinaw na dai sinda nagcocontra sa mga aksyon kan gobierno laban sa coronavirus (Covid). 


Sobra na nagiging ‘over acting’ an gobierno na dapat gibohon iyo an solusyon medical bakong bawalan na maghanap buhay.


Bako lang jeepney an apektado maging an tricycle, dawa ipasunod an ‘‘social distancing’’ asin magpadagos sa pagkayod magkukunsomo nin gasolina alagad lugi an tsuper asin operator.


Igwa man nin pangako an Department of Labor and Employment (DOLE) na matao nin cantidad cinco mil pesos alagad sagcod pa sana sa pangako, gulpi pang proceso.


Hagad kan sektor nin transporte na ipadagos an saindang pagkayod alagad kaipuhan naka face mask an pasajeros.    

                                        
An lakdang na ini kasunod kan pagdeclara sa state of public health emergency sa nasyon ni Presidente Rodrigo Duterte mantang aroaldaw padagos na naglalangkaw an caso sa covid-19.


 Segun pa sa lider kan Condor Piston sa Bicol na  iimplementar man an ‘’social distancing’’ asin ini maresulta na envez na sagcod sa veinte an pasajero sa sarong jeepney  makakatukaw na sana an sagcod sa sampolong pasajeros.


Dai na sinda makakabayad kan obligasyon sa saindang operator sagcod na mapiritan na magpundo na sinda magkayod kun sa aroaldaw na pagkayod kulang an pasajeros asin mayo nang ipupuling cuarta sa familia.


Nagtutubod si Pillogo na dai man dapat ini iimplementar sa provincia mantang mayo man nin malalang caso digdi sa ‘‘deadly virus’’.


Kun igwa man patient under investigation (PUI) asin an iba igwa nang sintomas yaon naman sa mga quarantine room kan hospital.


Dapat kun igwang gigibohon na aksyon an gobierno isipon na dai man maaapektohan an kabuhayan kan nasa sektor nin transporte, sabi pa kan Condor Piston.


Madaling magpaluwas nin direktiva alagad helingon man kan gobierno na dai man maliligis an saindang hanap buhay.


Bako lang sa mga PUJ maging sa pampasajerong bus asin van an apektado digdi kaya hagadan ninda na dai estrictohan an saindang sektor sa pagkayod aroaldaw.


Igwa man itataong relief goods kulang man na marhay sa aroaldaw na pagbuhay mala ngani dai man gabos na familia sa barangay dai man nakakarecibe nin ayuda hali sa LGU. (dpa)     

Share on Facebook
Share on Twitter
Please reload