NFA Bicol nangangaipo nin 160k sakong bagas

April 2, 2020

CSur kulang nang suplay

 

Ciudad nin Legazpi --- An National Food Authority (NFA) sa Bicol kinuconsiderar na bastante pa an saindang stock nin bagas mantang nakatalaan na mag-abot ngonian na semana sa Puerto kan Tabaco, Albay an 160 mil na sakong pig-angkat na bagas.

 

Nagbaba an suplay kan NFA rice huli kan sunod-sunod na pagbakal nin ribo-ribong sakong bagas kan mga lokal na gobierno kasunod kan Enhanced Community Quarantine (ECQ) kan gobierno sa tahaw kan padagos man na paglangkaw kan casong coronavirus disease (Covid-19) sa nasyon.


Si Jaharah Sy Pavilando, acting information officer kan NFA Bicol  nagpahayag sa Bicol Mail sa paagi nin text messages na igwa pa sindang piglalaoman na dugang na imported rice na maabot ngonian na semana.


Sa Camarines Sur na iyo an tambubong nin suplay nin bagas sa rehiyon cinco nagkukulang na an stock nin bagas sa bodega kan NFA sa barangay Palestina, Pili, Camarines Sur huli kan ribo-ribong nang sakong NFA rice na pinapaluwas sa saindang bodega mala ngani an mga LGUs nagkukulang na an saindang rice purchase order maging sa iba pang LGUs sa Bicol.


Si CamSur NFA Provincial Manager Alan Sabaybay nagpahayag na hinahalat ninda an dugang na suplay nin bagas sa opisina rehiyonal na nag-aasa man sa pag-abot nin suplay hale sa rehiyon tres (Central Luzon) asin rehiyon cuatro (Calbarzon).  


Pinahayag man ni Alcalde Nelson Legacion kan Ciudad nin Naga na igwa sindang purchase order na 27,540 na sakong NFA rice, alagad an narerecibe pa sana ninda sobra pa sana sa diez mil na sakong bagas.


Sa banwaan nin Libmanan na may 75 barangay, sinabi ni Alcalde Bernard Brioso na kulang man si saindang narecibing purchase order na NFA rice na sagcod sa ngonian naghahalat pa sinda kan dugang na suplay.


Kan nakaaging semana an NFA Bicol nagtalaan na magmulino nin 579 mil na sakong paroy nganing mahipnoan an padagos na pagbaba kan saindang suplay.


Afuera pa kaini, igwa na sana sindang 147 mil na sakong bagas sa mga bodega bilang ‘’butter stock’’ para sa doce (12) diyas. An ahencia nakadistribuer nan in maabot sa 35 mil na sakong bagas sa mga LGUs.


Sa saindang datus abot sa 42,000 na sakong bagas an nakukunsomo sa Bicol. (dpa)

Share on Facebook
Share on Twitter
Please reload