Pito na sa Bicol: Ika-5 caso sa Covid-19 na irehistro sa Naga

April 2, 2020

Nagrarahay na an sarong treinta años na babae sa Ciudad nin Naga na nagpositivo sa coronavirus disease (Covid-19) na inako sa quarantine facility kan Bicol Medical Center (BMC) na nagdara sa ika-limang caso sa Bicol.


Si Dr. Jose Manuel Rañola, jefe kan Infectious Disease Department kan BMC nagpahayag sa entrevista kan media na pasiring na sa recovery an pasyente.


Enot nang sinabi kan Department of Health (DOH) sa Bicol na igwa nang tolong caso sa Covid- 19 sa Albay asin saro sa Camarines Sur.


An ika-anom 60 años may travel history taga digdi sa Camarines Sur alagad dai sinabi kan DOH Bicol asin an ika-pito nag-eddad 63 años naka-confined sa BRTTH sa Albay.


Si Alcalde Nelson Legacion kan Ciudad nin Naga iyo an nagkumfirmar kan Lunes na banggui (Marso 30) sa paagi kan online announcement na igwa nang sarong caso sa Covid-19 sa ciudad na residente kan Sister Therese Subdivision, barangay Concepcion Pequeña.


An pasyente naaraman ni Legacion sa opisina rehiyonal kan DOH bako sa BMC na nagpahayag nin pagtuyaw sa hospital kan gobierno  huli ta dai pinaabot tolos sa City Health Office sa rason na igwang  policia  an   BMC  sa  physician-patient privilege.


Alagad an problema sa coordinasyon sa kan BMC asin City Hall naresolberan sa paagi kan asegurasyon kan hospital na regular na nindang ipapaabot an listahan kan mga Patient Under Investigation (PUM) sa City Health Office.


Sinabi kan jefe ejecutivo an pasyente nakaabot sa Filipinas hali sa Dubai, UAE kan Enero 30 alagad antes nagpuli sa Naga nagpasiring muna sa Ciudad nin Caloocan.


 Kan Marso 4, alas 9:00 nin banggui naglunad sa Isarog Bus asin nakaabot papuli sa Naga kan Marso 5, na nagbisita sa saiyang lolahon sa Sister Therese Subdivision.


Alagad kan Marso 8, an pasyente liwat naman nagviaje na nakaabot sa Resthouse sa Albay gamit an sarong pribadong van, sabi pa ni Legacion.


An pasyente nakamate nin kalintura asin nadidipisilan nin paghangos asin nagpa-check up sa sarong doktor sa Bicol Cardiovascular Diagnostic Cooperative (BCDC) antes nagpa-confined sa BMC.


Huli kan saiyang sintomas asin igwa pang travel history nagpakua nin sample sa paagi kan nasopharyngeal swabbing na dinara sa Research Institute for Tropical Medicine asin dagos  nang nagpa-confined sa BMC.


Sa ngonian an Sister Therese Subdivision an estricto nang pinapasunod an lockdown, contact tracing sagcod nagconducir na nin disinfection sa residente kan pasyente asin sa posibleng pigdumanan kaini asin si pag-iriba sa harong yaon na sa 14 diyas sa cuarintina.               (dpa)

Share on Facebook
Share on Twitter
Please reload