Stranded passengers sinalo kan Phil. Army

Ginatos nang mga stranded passengers na hali sa Manila asin provincia nin Quezon pasiring sa Bicol asin Mindanao an temporaryong kinupkop sa kampo kan 96th Infantry Battalion kan Philippine Army sa Basud, Camarines Norte asin an iba yaon sa Camp Elias Angeles, Pili, Camarines Sur matapos bagaton sa check point kan PNP asin militar huli kan estrictong pinapasunod na locked down epekto kan Enhanced Community Quarantine (ECQ).

KINUPKOP KAN MILITAR. Pinapababa kan 9th ID kan Phil. Army hali sa saindang military truck an mga hinahakot na stranded passengers nganing ilaog sa kampo mantang retrato sa too naagi muna sa disinfection booth antes ilaog sa isolation facility. (retrato kua kan 9th ID)

Si Major General Fernando Trinidad, Commanding General kan 9th Infantry Division kan Philippine Army sa Bicol na may base sa Camp Elias Angeles nag-orden sa saiyang mga taohan na bukasan an saindang kampo sa mga nagpipinitinsiyang Bicolano na kadakle construction workers ngani sanang makapuli sa saindang familia nin huli kan kawaran nin transportasyon mantang mayo na sindang trabajo kasunod pinapasunod na lockdown nganing malikayan an padagos na paglangkaw kan casong coronavirus disease (Covid- 19).

Si Army Captain John Paul Belleza, opisyal na parataram kan 9th Infantry Division kan Philippine Army sa Bicol na may base sa Camp Elias Angeles Pili, Camarines Sur nagpahayag sa Bicol Mail na maabot na sa 400 na stranded passengers an saindang natabangan na kadakle sa sainda nagkakagurotom mala ngani an iba nagtuturog na sana sa gilid kan mga tinampo mantang an iba kinua kan ibang mga lokal na gobierno.

Igwa man na mga health workers na naagi sa thermal scanner antes makalaog sa kampo.

An ginigibo kan mga opisyal kan militar nag-aapod sa mga lokal na gobierno kun mga taga saen an mga pasajeros nganing hakuton asin ilaog sa katorce diyas na cuarintina.

Kan nakaaging semana maabot sa trecientos an saindang temporaryong pinugolan nganing dai na mag-abante sa paglakaw pasiring sa Camarines Sur asin iba pang provincia kan rehiyon cinco.

Afuera kaini, 80 si yaon sa kampo kan 9th ID pasiring sa General Santos City, Surigao asin Masbate alagad nag-agi sinda sa medical check up asin sa ngonian nasa 14 diyas na cuarintina sa lumang Division Training School na pinagamit kan kampo bilang isolation facility.

Kan nakaaging Domingo (Marso 29), setenta an nawalat sa 96th IB mantang an iba pigkukua pa sana kan vehiculos kan LGUs.

Antes nagdesisyon an militar na bukasan an saindang kampo, igwa nang nakaabot na pasajeros sa Libmanan asin sa Rinconada area alagad sinda pig-cuarintina sa escuelahan.

Hinagad man kan opisyal kan militar na magtabang an rebeldeng NPA sa tahaw kan nangyayaring krisis sa virus sa nasyon. (dpa)