Bicol mantenido na matuninong huli kan ceasefire

Mantenido na matuninong an rehiyon Bicol puon na ibandera an unilateral ceasefire sa pag-ultanan kan 9th Infantry Division kan Philippine Army sa Bicol asin kan Communist Party of the Philippines (CPP) mantang padagos pang nasa Enhanced Community Quarantine (ECQ) an rehiyon kan Luzon huli kan coronavirus disease.

Puon na ideclara ni Presidente Rodrigo Duterte an ceasefire kan Marso 19 mayong pang nangyayaring pagbalga an rebeldeng New People’s Army sa Bicol.

Si Army Captain John Paul Belleza, jefe kan Division of Public Affairs Office kan 9th ID sa Bicol na may base sa Camp Elias Angeles, Brgy. San Jose, Pili, Camarines Sur nagpahayag na sagcod sa ngonian mayo pang insidente sa ano man na pagprobar na magbalga sa unilateral ceasefire an CPP/NPA.

Bakong arog kun panahon nin Pasko asin pagsabat kan bagong taon apesar na declarado an untok putok alagad nagpapasaway pa an rebeldeng NPA.

Enot nang pinahayag kan CPP sa paagi kan press statement ni Jose Maria Sison, kagfundar kan CPP na an saindang grupo padagos man sa paghiro asin kampanya laban sa coronavirus disease. Afuera pa kaini, sinabi pa na mayo sindang plano na magparibok contra sa tropa sa gobierno mantang nag-oobserbar kan unilateral ceasefire asin naghihiro sa paglaban sa ‘’deadly virus’’.

An lider kan kumunista yaon ngonian nakabase sa Utrecht sa The Netherland.

Sa Camp Elias Angeles sa Ciudad nin Legazpi, sinabi ni Brig. General Anthony Alcaneses jefe kan Philippine National Police sa rehiyon na padagos na nagbababa an crime incident sa Bicol epekto kan saindang estrictong pinapasunod na lockdown kasunod kan declarasyon sa Enhanced Community Quarantine.

Sa pinakahuring report naghuros sa 84 por ciento an crime rate sa Bicol, sabi pa. (dpa)