Checkpoint pigpapadagos kan PNP sagcod na yaon an ECQ

Sagcod na mayong pagbabago sa implementasyon kan Enhanced Community Quarantine (ECQ) sa Luzon pakatapos kan sarong bulan kaini sa April 15 ipapadagos kan PNP an lockdown.

Pinalawig ni Presidente Rodrigo Duterte an ECQ hasta sa Abril 30 an ano man na estrictong pagpasunod kan checkpoint mantenido kan PNP sa anom na provincias kan Kabikolan.

Ini an mga pahayag ni P/Major Malou Calubaquid, opisyal na parataram kan Bicol mantang an direktiva sa mga provincial director ni Brig. General Anthony Alcaneses, regional director kan Bicol PNP na mayong mangyayaring pagbabago sa implementasyon kan lockdown matapos aprobaran ni Presidente Duterte an pagpalawig kan ECQ sa Luzon hasta sa Abril 30, 2020.

Hinahalat sana kan Bicol PNP an ano man na panibagong direktiva hali sa Camp Crame nganing saindang iimplementar tolos digdi sa Kabikolan, sabi pa.

Nakatabang sa pagmantenir kan paz y orden an ECQ sagcod na estrictong pinapasunod an ano man na guidelines sa checkpoint na mawot iimplementar kan mga lokal na gobierno.

Sinabi pa kan Bicol PNP na nagbaba an crime incident sa rehiyon nin 84 por ciento kumpara sa 51 krimen na nangyari puon kan Marso 17 hasta sa presente.

Alagad huli kan sinasapong pagtios sa kawaran nin trabajado kan ordinaryong namamanuan huli kan lockdown saindang pinapadagos an pagpatrolya nganing dai maglangkaw an casong harabonan. (dpa)