JoSal: Bulawan na Iribanan

April 15, 2020

 

Siisay an mahuna na an duwang college scholars kan famusong Universidad de Nueva Caceres (non scolae sed vitae), an lalaki popular na newscaster asin station manager na malipoton an pagkalagong kan boses, estudyante kan College of Commerce, saka an mestisang magayon, scholar asin student leader kan College of Education, nagka-agoman sa Wedding of the Year kan (Abril 29, 1970) sa Peñafrancia Shrine, Naga City, duwang taon antes kan Martial Law?


Siisay an mahuna na an pambihirang kombinasyon na ini ma- producir nin 7ng aki, 6 na babae saka 1ng lalaki plus 7ng maku-apo, asin magiguin macolor na riding-in tandem sa politika sa bilog na Rinconada CamSur --- si dating Congressman Salvio B. Fortuno kan Nabua, Camarines Sur asin si incumbent Congresswoman Jocelyn Faustino Fortuno?


Si Sal an taong maski magayon an boses dai naglalangkaw an tono kun nagtataram, on air or off air, iyo an pigtiwalaan sa pagmanihar kan pinakadakulang Bikolano radio company, an Filipinas Broadcasting Network, Inc (FBN) na pagsasadiri kadto ni depuntong Senador Edmundo B. Cea sa laog nin halawigon na panahon dahil sa liputok na pagtubod saiya kan maisog asin madunong na outstanding provincial fiscal, bilang general manager. 


Nagpoon tulos siya nin halawig na karera sa servicio publico.


Enot, bilang director kan Canaman-Magarao-Bombon district kan Camarines Sur II Electric Cooperative sagkod maguin presidente kan cooperativa na pinaka joven, sagkod maguin topnatcher Bokal kan provincia nin Camarines Sur (35ng banwaan saka Iriga City) asin Bokal kan  Rinconada district.


Kan 1995, nangana siya como  vice-gobernor kan pinakadakulang provincia asin nagserve nin 3ng surunod na turno, an pinaka-enot sa siring na posisyon sa estorya kan Camarines Sur. Trangkelo asin produktivo an consejo provincial: nagka-igwa nin opisyal na estorya an CamSur, an Mayo 27 ideneklarang foundation day, official non-working holiday pati Naga saka Iriga City, naibalyo an celebrasyon kan Kaogma Festival hali sa Naga pasiring sa Pili capital town kan CamSur, minukna an Central Bicol State University of Agriculture (CBSUA), binuksan an famusong CWC asin Lago del Rey etc. etc.etc…


Kaya bakong makangalas na kan enot na magkandidato siyang congressman kan Rinconada area gana tulos. Pinanamit man siyang sarong daog for congressman pero kan  magbalik siya giraray bilang vice-gobernador, nakatapos siyang 3ng brilyanteng turno bilang congressman kan 5th district and the rest is history. Siya an pigbibistong  “Road Infrastructure King” kan provincia ta 100 porsiento kan mga tinampo sa saiyang distrito napakarahay niya asin naipacemento o espalto pati Buhi asin Balatan na haloy nagparaharalat na magka-igwa nin tultol na dalan.


Kan matapos siya kan turno bilang deputado kan 2019 rinibayan na kan saiyang magayon na agom sa kaparehong puwesto.


Primero idto sa estorya kan provincia na an sarong broadcaster na politiko riribayan man sana kan saiyang agom na paratukdo na nangana pati nin pinaka-dakulang mayoriya.


Kun iisipon an broadcast asin teaching profession pareho karera nin pagtukdo o edukasyon. An announcer sa likod kan micropono, an maestra sa atubangan kan mga aki sa laog kan classroom.


Si Sal consideradong Dean of Bikolano broadcasters, pirang beses naguin chairman kan KBP asin pigmimirar na idolo kan ginatos na working broadcasters na nag-agui sa lindong kan saiyang liderato asin pagmato poon kadto sagkod ngonyan.


Siya an nag-introducir asin nagmukna kan enot na news department nin sarong local radio network: an DZGE sa CamSur asin DZRC sa Albay na dating may mga sanga sa Tuguegarao, Cagayan asin San Pablo City.


An FBN an pinaka-bistadong training ground nin broadcast sa Bikol na nagproducir nin mga outstanding announcers asin DJ’s kundi pati mga darakulang lider-politiko: alcalde, bokal, vice-gobernador, gobernador asin congressman, mga station managers, KBP chairmen asin founders kan Association of TV and Radio Announcers of Camarines Sur o ATRACS na siya an solong adviser. Si Sal iyo an Santa Claus kan broadcast media taon-taon sagkod ngonyan.


Sa ibong na lado, si Jo Fortuno na nagpoon sana bilang public school teacher, naguin pamayo kan Alternative Learning School (ALS) sa Naga asin naguin lider/spokesperson kan Naga City Teachers Association (NACITEA). 


Natawan nin award o pagbisto bilang Most Outstanding Teacher of Naga City and Camarines Sur. An ambisyon lang kuta ni Jo bilang first lady ni Sal  asin bilang maboot asin mahigos na agom nin sarong politiko.


Ito palan dai aram kan kadaklan pig-aadalan niyang entero bako lang an hiro-hiro kan saiyang agom bilang servidor kundi an mga kaisipan ka ini asin pangaturugan.  


Kaya kan mangana siya  bilang primerong babaeng representante sa  kongreso kan Rinconada, an pinaka-dakulang political district nin Cam Sur, dai nagngalas si mga tao kan siya pakaputon bilang chairman kan mahalagang Committee on Bicol Recovery and Economic Development  (BRED).


Edukasyon para sa mga ka-akian asin jovenes kan Rinconada areas an saiyang ipinaglaban durante kan karampanyahan sagkod ngonyan na siya nakatukaw na.  


Sunod sa edukasyon iyo an hanapbuhay, trabaho, dagdag na ingreso sakada saro asin gabos na tao kan saiyang distrito.


Gigibohon niya yan sagkod na matapos an saiyang turno.


An saiyang partner an saiyang permanenting partner na si Sal nasa likod sana asin kataid niya man guiraray sagkod ngonyan.


Ini an taong dai nalilingaw sa mga amigo poon sa pagka-aki sa Nabua, high school sa Ateneo (siya an Yoyo King kan dekata 60) asin mga amigos y amigas asin mga kabarkada sa radyo asin telebisyon mantinido niya an liputok na relasyon.


Sabi kan iba siya na an amigo na dadamayan ka maski mag-aga. Sabi ni Mario Ochoa si Salvio Fortuno an masalbar asin mataong swerte bako lang sa Rinconada kundi sa Bikolandia.


Mayo siyang kalaban sa politika ta maski sa ibong na kudal kan Partido ka amigo niyang pirmi, sabi ngani kaiyan mayo siyang masamang tinapay.


An hapot ngonyan bako kun ano an futuro ni Sal o ni Jo kundi kun ano an futuro ni JoSal sa mga maabot na taon?


An saindang mga herideros y herideras: mga aki Joanne, Cherylyn, Anelle, Dessa, Josa, Jesette, JP: mga maku-apo: Sophia, Jada, Basti, Rylee, Ethan, Natalia, EJ (+). 


Si Sal an numero unong para-imbento nin mga tataramon na ginagamit asin naglalakop bako lang digdi kundi sa ibang lugar---“Maorag nang kadikit”, “Automatik” asin an pinaka-bantugan na “pangyayari”!.


Dai ta na muna isipon kun ano an plano kan duwa sa politika an importante na sinda macelebrar kan ika-50ng anyos bilang mag-agom sa maabot na Abril 29.


To Cong JoSal: Congratulations and Happy Golden Wedding Anniversary.


Mabuhay!

 

Share on Facebook
Share on Twitter
Please reload