Hospital ginibo nang estaran kan PUMs, PUIs

Ginibo nang quarantine facility kan lokal na gobierno kan Ciudad nin Naga an Infirmary Hospital sa barangay Carolina para sa Patient Under Monitoring (PUM) asin Person Under Investigation (PUI) mantang naka-lockdown pa sagcod sa ngonian.

An desisyon kan City Hall kadagdagan man sa kaparejong facilidad sa JMR Coliseum asin Pacol Elementary School sa barangay Pacol na napapano na kan mga PUM, sabi ni Alcalde Nelson Legacion.

Sinabi man ni Dr. Vito Borja, City Health Officer na dakul na mga OFW asin seaman an nakatalaan na magpuruli matapos magsara an saindang establisimiento huli kan Covid-19 asin preparado an ciudad para sa saindang quarantine facilities.

An hospital pinakandadohan kan ciudad mantang an saro sa empleado digdi aki kan nagadan na pasyente kan 66 años na ama na timaan kan coronavirus disease (Covid-19).

An familia kan biktima residente sa barangay Calauag na padagos pang estrictong pig-iimplementar an lockdown.

An aki kan nagadan na pasyente pigpasa-irarum sa katorce diyas na Person Under Monitoring (PUM) para sa proteksyon kan kapwa empleado kan City Hall laban sa posibleng pagwarak kan ‘‘deadly virus’’.

Afuera pa sa aki, si mga parientes asin iba pang mahal sa buhay na nagkaigwa nin kontak sa biktima gabos na piglaog sa quarantine facility kan City Hall nganing malikayan an pag-ulakit asin kaipuhan magsunod sinda sa pigmamando na 14 diyas na cuarintina kan Departamento de Salud. Sa ngonian igwa nin labi sa 800 na yaon sa mga quarantine facilities kan ciudad.

An hospital para sana sa mga menor na pasyente na hali sa itaas na mga barangay kan ciudad asin maging pigdadayo naman kan mga nagpapaconsulta mga pasyente hale sa Calabanga, Camarines Sur. (dpa)