Anti-discrimination ordinance sa health workers aprubado na

April 23, 2020

 

Pinangenotan ni Consejal Joselito del Rosario, chairman kan Committee on Public Safety sa Sangguniang Panlungsod an pagpasar kan ordinansa nganing maprotehiran an mga health workers, frontliners, volunteers, asin iba pa laban sa diskriminasyon alagad mas pinahiwas ini bako lang ngonian na panahon na may coronavirus disease alagad sa iba pang pasyente o may human infectious diseases.

 

Inaprubaran an ordinansa sa ginibong sesyon regular kan nakaaging semana asin suportado kan gabos na miembros kan Sangguniang Panlungsod mantang igwa nang naging biktimang health workers sa ciudad.


An kumpletong detalye asin seksyon kan ordinansa numerado 2020-033 mababasa sa inside page isyu ngonian na aldaw.


Antes pigsunad ni del Rosario an saiyang ordinansa, sa saiyang privilege speech kinundenar kaini an mga nagkaperang pasaway na ‘’standby’’ sa Barangay Balatas sa ginibong pambabastos asin kinurahawan an sarong health workers mantang nagbibisikleta papuli sa saindang residencia sa Barangay Cararayan na dai mag-agi sa saindang lugar huli ta may bitbit ining virus hale sa saiyang pigtatrabajohan sa Bicol Medical Center.


An bisikleta na gamit kan health workers pinasubli kan City Hall nganing igwang sasakyang pasiring sa saiyang trabajo sa BMC mantang nagdadanay pa an Enhanced Community Quarantine.


Afuera pa kaini, igwa pang insidente na pinahale an boarders na medical health workers kan  BMC kan maysadiri kan apartment sa Brgy. Concepcion Pequeña.


Sinda asin iba pang frontliners an nakakatabang nganing matabangan an satong banwaan sa krisis sa virus. Dai ta dapat sinda isikwal huli ta takot kita na maulakitan sa Covid- 19 alagad dapat sinda salodohan asin pasalamatan kan namamanuan, sabi pa kan consejal.


Nin huli kaini, kaipuhan an ngipong nganing kastigohon an mga pasaway, segun sa ordinansa.


Masangat pa sana nin anti-discrimination bill sa Senado si Senador Risa Hontiveros sa pagbuelta kan sesyon sa Mayo 2020 alagad an sadiring bersyon ni del Rosario mas pinahiwas bako lang sa panahon kan Covid-19. (DPA)

Share on Facebook
Share on Twitter
Please reload