SA CAMARINES SUR: Duwang hospital pig-aandam para sa pasyente sa Covid-19

April 23, 2020

 Nakatiwang-wang na infirmary hospital gigibohon Covid-19 hospital.

 

 

An Capitolyo Provincial kan Camarines Sur pig-aandam na an Camarines Sur Provincial Hospital na nasa 80 por ciento nang nakumpleto an edificio asin an nakatiwang-wang na Calabanga Infirmary Hospital nganing gibohon na hospital para sa pasyente sa coronavirus disease (Covid-19) oras na magkaigwa nin mga caso digdi sa provincia.

 

Dawa mga Patient Under Investigation (PUI) asin Person Under Monitoring (PUI) an tinatabangan ngonian kan gobierno provincial alagad mas marhay na igwang exclusivong hospital an Camarines Sur mantang an kakayahan sana kan Bicol Medical Center (BMC) para sa siyam na Covid-19 patients.


An Capitol Community Colleges kan provincia sa mga banwaan kan Libmanan, Baao asin Garchitorena iyo an ginibong estaran muna kan mga PUM asin PUI mantang suspendido an klase huli kan Covid-19.


Si Vokal Angel Naval kan tercer distrito kan Camarines Sur nagpahayag sa entrevista kan Bicol Mail sa paagi nin telepono na padagos an mga ginigibong preparasyon kan liderato ni Gobernador Migz Villafuerte mantang magkatuwang sinda kan Department of Health (DOH) na igwa nang ibubugtak na mga medical equipment facility na nagcacantidad nin P500 milyon.


An Provincial Hospital namumugtak sa barangay Banasi, Bula, CamSur padagos na an mga ginigibong preparasyon afuera pa kaini maging an Infirmary Hospital sa barangay Paolbo, Calabanga, CamSur igwa nang mga pag-andam an Capitolyo asin an DOH.


Sinabi pa kan vokal kan tercer distrito kan CamSur an mga ginigibong sesyon kan junta provincial sa pamamayo ni Bise Gobernador Imelda Papin nakatutuk sa mga programa sa Covid-19 kabale na an pagtabang sa mga frontliners asin sa rinibong residentes kan barangay na apektado an saindang pagbuhay huli kan Enhance Community Quarantine.    

 
Sa caso sa coronavirus disease sa Bicol sa ngonian base sa datus kan Department of Health sa rehiyon igwa nang 21 caso sa Albay, 13 kaini narahayan na. Sa Camarines Sur enot nang na-irecord an limang caso, saro kaini na taga Ciudad nin Naga binawian nin buhay asin an tolo narahayan na asin an pinakahuri  na pinaka-joven 17 años na babae taga Naga. (danny p. aureus)

Share on Facebook
Share on Twitter
Please reload