Mga nagsisinutil sa ’price tag rule’ pinatanidan kan NCPCC

An Naga City Price Coordinating Council (NCPCC) nagpaluwas nin patanid sa mga negosyante na tatamaan na sinda nin penalidad kun padagos na magsisinutil sa dai pabugtak nin ‘price tag’ sa saindang pinapabakal na mga produkto sa mercado maging kan market on wheels asin iba pang mga tiendahan sa ciudad.

Sa pinaluwas NCPCC Order No. 01, Series of 2020 petsado Abril 20, 2020 na pirmado ninda Alcalde Nelson S. Legacion komo chairman asin Consejal Jose B. Perez komo executive director kan kaparejong consejo na estricto nang iimplementar kan City Hal an Acta Republica 7581 na mas midbid sa Price Act asin Acta Republica 7394 na mas midbid sa Consumer Act, alagad apesar kan mga leyes na ini, dakul na mga parukyano an nagrereclamo huli sa pagbalga sa mga especifico provision sa paliog nang presyo asin maninigong pagbugtak kan price tags sa mga produkto na saindang pinapabakal apesar kan deklarsyon kan state of calamity sa rehiyon kan Luzon huli kan coronavirus disease (Covid- 19) pandemic na nagtama sa nasyon.

Kabale sa orden kan NCPCC na dapat igwang price tags iyo an mga pinapabakal na produkto asin basic commodities sa Naga City People’s Mall, supermarkets, grocery stores, convenient stores, satellite markets (Talipapa), asin market on wheels sa Ciudad nin Naga.

An arin man na persona na magbabalga sa sa mga provision kan ley sa enot na pagsinutil mamulta nin P200.00 alagad dai masobra sa P5,000 o puedeng macarcel sa laog nin sarong bulan alagad dai malampas sa anom na bulan na pagkaka-preso o kaparejong penalidad depende sa desisyon kan jusgado. Sa ika-duwang conviction an penalidad babawian nin business permit asin lisensiya. (DPAureus)