NCSB tinukahan tukdoan nin advance lessons an mga naka-bakasyon na estudiantes

May 8, 2020

Kinakaipuhan maghimo nin mga programa an Naga City School Board (NCSB) nganing makatabang sa mga estudiantes na apektado kan Covid-19  pandemic sa paagi kan iimplementar na mga estratihiya para sa Home Study Learning Program kan mga estudiantes na sagcod sa ngonian paralisado an saindang pagklase huli sa kinakatakotan na ‘‘deadly virus’’.


Sinda Consejales Joselito del Rosario asin Esteban Greg Abonal III iyo an padreno kan resolucion numerado 2020-159 na may titulong ‘‘Resolution earnestly requesting the Naga City School Board to implement strategies and interventions to reinforce home study learning programs for educare elementary, secondary and alternative learning system (ALS) students in the City of Naga to mitigate the impact of Covid-19 pandemic in the education sector’’


An resolucion pinaburan kan mga miembros sa sesyon regular kan SP kan Martes, Mayo 5, 2020 asin nakatalaan nang isumiter sa lamesa ni Alcalde Nelson Legacion nganing aprubaran.


An katuyohan ninda del Rosario asin Abonal nganing dai masayang an halawig na bakasyon kan mga estudiantes matapos suspendiron kan DepEd an mga klase sa  gabos na levelo tanganing makalikay an mga aki asin estudiantes, paratukdo asin personajes sa Covid-19.


Sa resolucion ipasunod an programa kinakaipuhan maghaman kan mga minasunod: 1) Magpreparar nin simplified lessons para sa Educare Pupils. 2) Maghimo nin advance lessons para sa mga aki, estudiantes na maabante na sa mas halangkaw na grado. 3) Advance lessons para sa mga estudiantes sa ALS asin 4) Matukdoan nin amay para sa Arabic learners sa irarum kan ‘‘ALIVE program’’.


An programang ini kan City Hall sa edukasyon pinaka-enot sa nasyon mantang apektado an gabos huli sa pandemia.


Kabale sa trabajo kan NCSB, alagad kaipuhan mag-agi sa DepEd guidelines sa Covid-19 asin iba pang mga pulicia dapat mag-adaptar nin mga mekanismo asin giya para sa dagdag kaaraman kan estudiantes sa paagi kan online learning modalities para sa educare, elementary, high school asin estudiantes sa ALS, magbilog nin sub-task groups asin magpinalisar kan mga recomendasyon kan manlaen-laen na sub-task groups.


Base pa sa reslucion magkakaigwa nin kumpusisyon afuera kan regular na miembros igwa pang mga imbitadong working guests.

Share on Facebook
Share on Twitter
Please reload