Duwa sanang LGUs sa Bicol naka-liquidate kan SAP fund

Duwa sanang banwaan sa rehiyon Bicol sa 104 mga lokal na gobierno sa nasyon na nakabali sa nakakumpleto nang magwaras kan Social Amelioration Program kan Department of Social Welfare and Development (DSWD), an 100 percent liquidation SAP fund.

Sinabi kan DSWD an 104 sa 1,632 mga LGUs na nakakumpleto kan saiyang payout sa SAP.

An mga banwaan sa rehiyon cinco kinababalihan kan San Vicente, Camarines Norte asin Casiguran, Sorsogon asin an duwang banwaan na ini iyo si nakabale sa sampulong LGUs na nakaayon sa nakagibo kan saindang 100 percent liquidation kan fondo hale sa SAP.

An iba pang mga LGUs na nakabale sa sampolo iyo an Adams, Ilocos Norte, Pandi asin San Miguel parejo kan rehiyon III; Jordan Guimaras, Buenavista, Guimaras asin EB Magalloa, Negros Occidental kan rehiyon VI; Sulyo asin Tomgano parejo kan Davao del Sur.

An listahan na ini base sa report kan DSWD central office hasta kan Abril 30, 2020 na dapat tapos na an distribusyon kan P5,000 na ayuda sa mga residentes na apektado an saindang pagbuhay huli kan Enhanced Community Quarantine (ECQ).

An Department of Interior and Local Government (DILG) enot nang nagpatanid sa mga LGUs na tinatawan sinda nin hasta sa Abril 30 nganing taposon an payout alagad dai man ini nasunod envez pinalawig hasta sa Mayo 7, 2020.

Sinabi ni Director Arnel Garcia kan DSWD Bicol sa 35 mga LGUs sa Camarines Sur igwa pang nawalat na sampulong LGUs na dai pa natatapos an saindang distribusyon kan SAP na kinababalehan kan Canaman, Tinambac, Baao, Nabua, Libmanan, Lagonoy, Milaor, Bato, Pasacao asin Sipocot.

Sa mga banwaan na ini an saindang payout nag-aabot nin 88 por ciento hasta 98 por ciento.

Nagpatanid man an ahencia na dai pa ninda maitatao an ika-duwang hornada sa payout sagcod na dai pa nakaka-liquidate kan fondo.