P20 na tarifa sa tricycle marhay na sa mayo

May 14, 2020

An Piston Development Cooperative, sarong cooperativa nin mga operator asin tsuper nin tricycle sa Ciudad nin Naga nagpahayag na sainda na sanang susunodon an pigmamandong flete kan City Ordinance No. 2020-40 nganing sanang magpadagos kan saindang hanap buhay dawa dikit sana an dilencia sa maghapon na pagkayod sa panahon kan General Community Quarantine (GCQ).


Si Piston General Manager Domingo Porlaje nagpahayag an ordinansa na nagmamando na magpalunad sana nin sarong pasajero asin veinte pesos na singil sa flete sa trimobile igwa naman nin ipupuling P250 an tsuper sa saindang familia.

Integrated North Bound Jeepney Terminal sa rutang Naga, Canaman, Magarao, Bombon, Calabanga, Tinambac  asin  Siruma  paralisado  an operasyon mantang dai pa natatawan nin special permit an mga PUJs kan LTFRB nganing magbuelta sa saindang pagkayod. (dpa)

 

 

Sa pinasar na ordinansa ngonian na panahon kan GCQ dapat P20 an singil sa regular na pasajero asin P16 discounted fare sa senior citizens, persons with disability (PWD) asin estudiante.


Piglimitaran kan City Hall an papalunadon sa trimobile nganing masunod an ‘;social distancing’’ na pigmamando sa guidelines kan inter-agency task force.


Si Santos Nidea, 25 anyos nang tsuper nin tricycle asin miembro kan Piston nagsabi na sa sarong aldaw niyang pagkayod nakakatipon man siyang P750.00 mantang an P250 digdi iyo man an para sa operator asin an P250 para sa gasolina asin an tadang P250 iyo man an ipupuli sa saindang familia.


Ini kumpara kun bakong ECQ/GCQ inaabot man nin P1,000 alagad an P250 ngonian na GCQ marhay na sa mayo kumpara kan panahon kan ECQ mayo sindang kayod asin pambakal nin bagas para sa saindang familia envez naghahalat sana kan ayuda hale sa barangay, sabi pa ni Nidea.


Dinagdag pa ni Porlaje na kun normal sa panahon na mayong ECQ/GCQ, dakul man kuta an mga pasajeros alagad dakul man an mga nagkakayod na tricycle bakong arog ngonian na limitado sana.


 An ordinansa nagsasabi pa na bako gabos na trimobile dapat magkayod alagad pigtukahan si mga nasa even number na ‘’0, 4, 6, asin 8 dapat sa aldaw nin mga Lunes, Miercules asin Viernes mantang si add number na ‘‘1, 3, 5, asin 9 sa mga aldaw nin Martes, Jueves asin Sabado, alagad pag aldaw nin Domingo pahingalo sinda gabos.


Apektado pa an saindang pagkayod huli ta kulang an mga pasajeros huli kan GCQ na mayo pang klase sa mga pribado asin pampublikong escuelahan sagcod na kulang pa an mga naglalaog sa trabajo.

Share on Facebook
Share on Twitter
Please reload