SA SCHOOL YEAR 2020-21: DepEd mapasunod na kan online classes

May 14, 2020

An Departamento de Edukasyon (DepEd) nag-aandam na kan online classes sa masunod na school year 2020-21 mantang iginilid na an ‘‘face-to-face learning’’ bilang pagtao nin prioridad kan ahencia  sa seguridad kan salud nin estudiantes asin paratukdo nganing makalikay sa dai pa natutunaw na coronavirus disease (Covid-19).

 

Alagad nagkapera sana ini sa learning delivery options na pueding ipasunod an face-to-face blended learning, home schooling asin iba pang programa na iimplementar sa burokasan nin klase sa Agosto 24, 2020.

 

Si Dr. Mariano De Guzman, City School Superintendent kan DepEd sa Ciudad nin Naga nagpahayag kaini sa sesyon regular kan Sangguniang Panlungsod kan Martes, Mayo 11 tanganing ipaaram sa lokal na gobierno an saindang mga preparasyon sa masunod na school year sa tahaw kan padagos pang nangyayaring krisis sa salud.


Si mga dating ginigibo sa mga classrooms dai na mangyayari ngonian envez kun igwang estudiantes sa sarong classroom na dating inaabot nin 40 hasta sa 50 huli kan halangkaw na enrollees alagad magiging 20 na sanang estudiantes.  Sinda iyo si mayong gamit na gadget mantang si ibang yaon sa harong maparticipar sa klase sa paagi kan virtual learning o sa paagi ‘’blended learning’’.


Sinabi pa ni De Guzman huli kan importanteng marhay an iimplementar na bagong learning options nagkakaigwa sinda nin  profiling asin mapping kan saindang mga paratukdo.


Sa gigibohon na online classes asin iba pang bagong programa sa pagtukdo kan ahencia, saindang pig-aaram an kakayahan o skills sa paggamit nin gadget sa paagi kan information technology, an saindang mga gagamiton na gadget asin sainda sinda nag-eestar.


Para sa virtual learning option dapat igwa sindang koneksyon sa internet huli ta kun mayo dai man ini mangyayari, sabi pa kan opisyal kan DepEd.


An mga paratukdo kinakaipuhan nang maglaog sa saindang mga escuelahan para sa pagpalista kan mga estudiantes puon sa Hunyo 1.


Alagad mientras na ginigibo an enrollment magkakaigwa na nin validations sa mga estudiantes para sa saindang ‘‘matching’’  asin kan paratukdo para sa ipapasunod na online classes.  

  
Si mayong gadget igwang opsyon sa modular tatawan sinda nin hard copies na puedeng basahon asin kun igwang mga cuestion puedeng simbagon sa harong. Sinda malaog sana sa escuelahan saro hasta sa duwang veces.        


An mga superbisor kan DepEd nagkakaigwa man kan saindang workshop sa pag-andam kan mga materiayales na gagamiton kan estudiantes.      


Dinagdag pa ni De Guzman na magkakaigwa sinda nin budget allocations nganing i-realigned an fondo hale sa sports program, national press conference, national festival of talent asin iba pa na gabos cancelado na.
An fondo gagamiton kan ahencia para sa gadget, laptop, cellphone asin sa iinstelar na internet connection. (DPA)
   

Share on Facebook
Share on Twitter
Please reload