PATANID KAN DOH: Bicol nakahawas na sa ECQ, dai magkampante vs Covid-19

An Departamento de Salud (DOH) sa Bicol nag-apelar sa publiko na dawa hinale na sa General Community Quarantine (GCQ) an rehiyon cinco alagad dai man na-ngangahulogan na normal na an pamumuhay.

Si Director Ernie Vera, regional director kan ahencia nagsabi na dapat mantenido man giraray an minimum health standards sa rehiyon cinco kaparejas kan iba pang lugar na pinalibre na sa Enhanced Community Quarantine asin General Community Quarantine kan Inter-Agency Task Force.

Kabale sa dapat regular na gibohon iyo an social distancing, paghugas nin kamot dawa oras-oras asin pag-disinfect sa kapalibotan.

Afuera kan rehiyon cinco an iba pang lugar na nakahawas na sa ECQ/GCQ iyo an Region I; Region IV-B; Region VI; Region VIII; Region X; Region XIII asin ARMM.

Hinahahalat pa kan ahencia an ipapaluwas na bagong guidelines hale sa IATF sa pagconducir nin mass gatherings mientras na dai pang nadidiscobreng bulong o pambakuna sa Cororanvirus disease (Covid-19).

Dai naheheling an kalaban na Covid-19 asin considerado pang bakong normal an satong pagbuhay, sabi pa. An Philippine National Police sa Bicol sa pamamayo ni Brig. General Anthony Alcaneses nagpahayag na ipapadagos ninda an pagmantenir kan mga checkpoint alagad defende sa bagong ipapaluwas na directiva kan saindang higher command kun ano an mga bagong iimplementar sa tahaw kan dai pa normal an kamugtakan asin dai pa nahahale an ‘deadly virus’’.

Digdi sa Bicol an may mga caso nin Covid 19 iyo an Ciudad nin Naga, Albay, Camarines Norte, Camarines Sur asin Catanduanes. Igwa nang total na 62 caso kadakle an pasyente yaon sa Bicol Regional Training and Teaching Hospital sa Albay asin Bicol Medical Center sa Ciudad nin Naga.