Doceng buses tinugotan na magviaje sa CamSur, Naga

May 21, 2020

Sa treinta y cinco mga banwaan asin duwang ciudades sa Camarines Sur duwa pa sanang municipalidades an magkakaigwa na kan saindang regular na viaje pasiring sa Ciudad nin Naga matapos ma-isyuhan na nin special permit kan Land Transportation and Franchising Board (LTFRB), an doce pa sanang aircon buses na may rutang Del Gallego asin Sipocot.

 

Sa duwang mga banwaan na ini pitong unit nin bus an magdadalagan sa Del Gallego – Naga asin duwa sana sa Sipocot – Naga.


Sinda kaipuhan magpasunod kan ‘social distancing’ sa mga pasajeros asin iba pang mga health protocol base sa guidelines kan Inter-Agency Task Force (IATF).

Duwang AMV Travel & Tourist Inc. bus sa Bicol Central Station sa Ciudad nin Naga na may special permit sa LTFRB naghahalat pasajeros viajeng Sipocot asin Del Gallego, Camarines Sur. (dpa)

 

 

Ini an kinumfirmar ni LTFRB acting regional director Edgardo Montialto ki Roderick ‘Nonoy’ Reforsado, manager kan Bicol Central Station (BCS) sa Ciudad nin Naga alagad an mga pampasajerong jeepney (PUJs) iginilid sana huli ta maabot sa 98 por ciento sa sainda an dai nagkukumple sa pigmamandong rekisitos kan Department of Transportation (DOTr).


An Condor-Piston sa Bicol nagrereclamo sa LTFRB huli ta apesar si dating ruta an saindang viaje kaipuhan pa giraray magkua nin special permit alagad dapat magrehistro muna sinda sa Cooperative Development Authority o pag-consolidate sa korporasyon na imposibleng maproceso tulos  asin  naheling  ninda an motivo kan DOTr nganing dai na sinda makakayod ta iimplementar na an jeepney modernization.


An rehiyon Bicol na declarado pa bilang nasa general community quarantine (GCQ) an mga pampasajerong bus binabawalan pa na magbuelta sa saindang regular na viaje na luwas sa provincia.


Huli kaini, segun sa LTFRB Bicol  nagpaluwas nin direktiva an DOTr na magbukas sinda nin bagong ruta para sa laog sana kan sarong provincia na kaipuhan magkua muna nin special permit nganing magpadagos kan saindang pagkayod an buses.


Sa bagong mga ruta tinitugotan sana kan ahencia an 72 na mga buses na magviaje sa Bicol alagad igwang designadong kanya-kanyang provincia asin an 19 kaini sa Camarines Sur mantang igwa nang naenot na doceng buses na viajeng Del Gallego asin Sipocot – Naga.


Nagbukas man nin bagong  ruta  an LTFRB para sa Magsaysay-San Felipe-Pacol asin Carolina alagad para sana sa sarong bus asin an ika-duwang ruta Del Rosario viajeng Cararayan - San Isidro alagad sagcod sa ngonian mayong aplikante para sa special permit.


Sinabi pa ni Reforsado na an paliwanag ni Montialto ano man na bagong rekisitos sa LTFRB pig-iimplementar sana kan ahencia an memorandum kan DOTr. (DPAureus)

Share on Facebook
Share on Twitter
Please reload