Pagpalista sa public school, unlimited

May 21, 2020

An Department of Education (DepEd) sa Ciudad nin Naga nagpahayag na lilimitaran na sana sa veinteng (20) estudiantes sa cada classroom alagad dai man sinda maimponer na bawasan an enrollment sa masunod na school year 2020-21.


Kun dati-dati inaabot nin 40 hasta 50 estudiantes sa mga classroom sa escuelas publika alagad limitado na mientras na puponan na sa masunod na school year an online classes huli ta iginilid na kan DepEd an ‘’face-to-face learning’’


Kan nagtalikod na school year nagsakat sa cincuenta (50) mil an estudiantes sa elementarya asin segundarya sa mga public school sa Ciudad nin naga asin an veinte mil kaini si enrollees sa segundarya.


Si City School Assistant Division Supt. Sueno Luzada, Jr. kan DepEd Naga nagsabi sa Bicol Mail na dai man sinda ma-imponer nin limitasyon sa pag-ako kan mga mapalista sa escuelas publika envez an mangyayari huli ta si ibang may mga gadget puedeng mag-atender sa klase sa paagi kan online o virtual learning.


Si mayo nin mga gadget iyo an maatendir sa classroom o sa face-to-face learning na estrictong iimplementar kan ahencia an physical distancing base sa guidelines kan Inter-Agency Task Force nganing malikayan an paglangkaw kan casong coronavirus disease (Covid-19).


An ibang Parent Teacher’s Association (PTA) nahadit sa limitado sanang estudiantes sa classrooms ta posibleng dai maka-enroll an saindang estudiantes alagad ini piglinaw kan DepEd.


Afuera kan virtual learner segun pa sa DepEd Naga nagkapera sana ini sa learning delivery options na puedeng iimplementar an face-to-face blended learning, home schooling asin iba pang programa sa burokasan nin klase sa Agosto 24.


Pig-aandam na kan DepEd an enrollment period na masilad sa Hunyo 1, 2020 asin classrooms.


Hinahagad na kan DepEd an tabang kan lokal na gobierno kan Ciudad nin Naga na mag-instelar nin wifi cada barangay nganing magamit kan estudiantes asin paratukdo.


An ahencia nag-aandam man kan saindang mga internet connection sa mga escuelahan.  (dpa)

Share on Facebook
Share on Twitter
Please reload