Termino kan mga director sa Casureo II mapapalawig

May 21, 2020

Mapapalawig an tolong taon na termino sa opisina kan mga elihidong director kan Camarines Sur II Electric Cooperative (Casureco II) Inc., hasta sa bulan nin Mayo 2021 na piglalaoman mapaluwas nin memorandum an National Electrification Administration (NEA) nganing magpako kan masunod district elections.


An naging isyu kan NEA huli kan enhanced community quarantine (ECQ) asin an padagos na paglangkaw kan casong coronavirus disease (Covid 19) asin an pag-uktaba kan eleksyon bako lang sa Casureco II envez sa gabos na cooperativa nin electricidad sa nasyon.


Afuera pa kaini, an Casureco II kinakaipuhan na magtipid mantang an fondong P17.5 milyon kan Corporate Social Responsibility (CSR) gagamiton sa pag-abunar sa mawawarang fondo kan cooperativa para sa libreng 20 kilowatt reduction kan residential consumers para sa billing kan bulan nin Abril asin ini parte kan Pantawid Liwanag Program kan cooperativa nin electricidad.


Si Rinner Bucay, opisyal na parataram kan cooperativa nagsabi an saindang district elections dapat gibohon sa Agosto asin sa ibang distrito sa masunod na mga bulan kan 2020.


An mga distrito kan Casureco II na mayong elihidong director kinababalehan kan Naga South District, Minalabac District asin Canaman District mantang an mga distrito na igwang representante sa junta directiva kinababalehan kan Calabanga, Tinambac-Siruma, Bombon, Magarao, Naga North, Pili, asin Milaor. Si Jennis Nidea, nombradong director kan NEA asin si director Paul John Sta Ana iyo an pamayo kan junta.


Bako lang sa district elections, sinabi pa ni Bucay na resulta sa implementasyon kan 20 kWh reduction, an cooperativa cancelado na an mga pigtalaan na actividades ngonian na taon na kinababalehan kan annual general membership assembly (AGMA), Christmas party, asin Casureco II Foundation Day na pigtalaan sa Agosto ngonian na taon. (DPA)      

Share on Facebook
Share on Twitter
Please reload