SA POSIBLENG PAGCANCELAR KAN SCHOOL YR 2020-21: DepEd naghihinayang kun igigilid an klase kan mga ak

An Department of Education (DepEd), pigmamandohan kan Acta Republika 1797 na dapat magtalaan nin pagbubukas nin klase cada bulan nin Hunyo hasta sa laog kan bulan nin Agosto.

Kun dai uyon digdi si Presidente Rodrigo Duterte dai man makacontra an ahencia bilang siya an pamayo kan nasyon, alagad an pag-enmienda kan ley kinakaipuhan asin magdedepende sa opinyon legal kan sarong abogado.

Ini an mga pahayag ni DepEd regional director Guilbert Sadsad sa media kasunod kan naging pahayag ni Presidente Duterte sa television na magiging ‘‘useless’’ sana an burokasan nin klase sa Agosto 24 kun mayo pang na-iimbentong bakuna contra sa coronavirus disease (Covid-19).

An mawot mangyari kan pamayo kan nasyon na seguradohon an salud kan mga estudiantes laban sa salud alagad kun yaon pa an health crisis huli sa Covid 19 dai siya uyon na gibohon na an burokasan nin klase sa Agusto 24 para sa school year 2020-2021.

Sinabi pa kan DepEd Bicol an mangyayari kaini dakul na mga kaakian an masasayang an saindang panahon sagcod na maubos an taon sa pagkarawat sa kalye o tinampo magiging standby sayang si saindang pig-adalan kan nagtalikod na school year.

Sa programa kan DepEd, iimplementar an social distancing asin kun may estudiantes sa classrooms lilimitaran sana sa veinte mantang si iba sa paagi kan virtual learning.

Dai na mangyayari an ‘‘face-to-face learning’’ nganing makalikay sa virus alagad kabale sa planong iimplementar iyo an homeschooling, online classes asin iba pang learning delivery options.

An problema kan DepEd si mga estudiantes na mayong kakayahan an saindang mga magurang na makabakal nin gadget na kaipuhan pa digdi an internet connection.

Dawa nagpahayag si Duterte na ‘‘useless’’ an burokasan nin klase sa Agosto 24 alagad an DepEd masikad na kan saindang enrollment period puon sa Lunes, Hunyo 1 hasta Hunyo 30. (dpa)