SA TABANG NI DUTERTE: BMC mabukas Covid-19 testing sa Bicol


Bicol Medical Center pigsuplayan na kan DOH nin mga GeneXpert Cartridges para sa Covid 19 testing. (GX)

Mapapadale na an proceso nganing maaraman tolos kun positivo an sarong pasyente sa coronavirus disease (Covid 19) sa Bicol matapos makahagad nin 600 GeneXpert Cartridges an Bicol Medical Center ki Presidente Rodrigo Duterte asin sa Departamento de Salud (DOH).


Si Dr. Francisco Sales, OIC Medical Director kan BMC nagpahayag nin pasasalamat sa Presidente asin sa DOH nganing masuplayan nin mga GeneXpert Cartridges para gamiton sa pag-testing sa mga pasyente sa Covid 19.

Alagad piglalaoman ngonian na aldaw puedeng maging operational na oras na mag-abot na an license to operate hali sa Research Institute for Tropical Medicine (RITM) asin sa DOH matapos ma-accredit na ngonian na semana an saindang facilidad.

An bagong facilidad kan BMC maserbe sa mga pasyente kan Camarines Sur, Ciudad nin Naga asin Camarines Norte.

An cartridges, an teknolihiya kaini nahaman para sa TB molecular diagnostic testing, alagad puede nang magamit para sa Covid-19 testing base sa pinakahuring – Cov 2 Cartridges.

Gibo sa Estado Unidos kan Cepheid Company asin kan organisasyon na Foundation for Innovation New Diagnostic (FIND) na suportado kan American National Institute of Health.

Piglinaw kan BMC an GeneXpert Cartridges iba sa Rapid Antibody Test huli ta ano man na resulta digdi kaipuhan pa an confirmatory testing kan DOH alagad sa cartridges maaaraman tulos an resulta sa laog nin viente cuatro oras.

Sa ngonian pigpapakarhay na an Bicol Diagnostic Reference Laboratory kan pinakadakulang hospital sa rehiyon cinco alagad naglalaom an OIC Medical Director madadagdagan pa sinda kan cartridges hale sa DOH asin sa tabang ni Duterte nganing dakul an paserbihan bako lang digdi sa Camarines Sur envez sa iba pang provincia kan Kabikolan.

Sinabi man ni Tommy Lee kan Office of the Presidential Adviser for Bicol Affairs kaipuhan sanang magsurat giraray si Dr. Sales ki Presidente Duterte nganing eendorso ni Usec Marvel Clavecilla para matabangan asin madagdagan an 600 na cartridges.

An BMC igwa nin suhay na quarantine facility para sa mga pasyente kan ‘’deadly virus’’.

An LGUs kan Ciudades nin Naga asin Legazpi igwa na kan Rapid Antibody Test. Digdi pig-aaraman an Immunoglobulin G (IgG) asin Immunoglobulin M (IgM) antibodies kan tawo.

Magkaiba an duwa, sa IgM antibodies digdi maheheling an resulta na posibleng igwa nin inpeksyon an pasyente maging sa bagong maumayan sa inspeksyon.

Sa IgG antibodies maheheling sa pasyente, nagsasabi na posibleng nagkaigwa nin inpeksyon an pasyente sa bacteria o virus kan nakaaging pitong aldaw alagad dai pa an inpeksyon.

Alagad an magiging positivo dai man nangangahulogan na positivo na sa Covid -19 infection. (dpa)