Festividad ni Ina apektado kan Covid-19

Nagtutubod an Arts Culture and Tourism Office (ACTO) kan City Hall na ciertong apektado an mga turista asin devotos na planong magsungko sa Ciudad nin Naga nganing mag-atendir sa dakulang kapiestahan ni Nuestra Señora de Peñafrancia sa Septiembre ngonian na taon.

Ngonian na 2020 huli kan pandemia sa dating record kan ACTO na 1.5 milyon na tourist arrival sa ciudad alagad nagbagsak ini sa 400,000 nalang o nagbaba nin 75 por ciento.

Sagcod na dai pang confianza an mga tawo na mag-viaje, natatakot pa an mga turista asin devotos ni Ina mantang dai pa nahahale an problema sa krisis sa salud huli kan mayo pang nadidiscobreng bakuna laban sa coronavirus disease (Covid-19).

Ini an mga pahayag ni Alec Francis Santos, jefe kan ACTO sa entrevista kan Bicol Mail mantang pig-aadalan pa kan Archidiocesis nin Caceres asin kan City Hall an mga pagbabago sa mga actividades kan Festividad ni Ina orog na an pagpasunod kan ‘‘social distancing’’ na mandato sa guidelines kan Inter-Agency Task Force (IATF).

Sinabi pa dai aram kan mga tawo sa pag-viaje kun mag-implementar naman nin pag-lockdown puedeng ma-stranded an mga bisita kan ciudad.

Sagcod na mayo pang kasegurohan an peligro sa salud padagos na magduduwa-duwa an mga ribo-ribong devotos asin dai maglaom na milyon an mga masungko arog kan nakaaging mga taon, sabi pa ni Santos.

An simbahan nakatalaan pang magpinalisar kan saindang plano sa Peñafrancia fiesta sa ipapaapod na urulay ni Obispo Rolando Tria Tirona kan Arzobispo kan Caceres. (dpa)