Infra proj dai tinutonga kan manga trabajador

June 11, 2020

Igwa nang direktiva an Department of Public Works and Highways (DPWH) nganing ipadagos na an konstruksyon kan mga napendienteng proyecto huli kan lockdown alagad na-aabala naman huli kan estrictong pinapasunod na health standard kan Department of Health (DOH).

 

Si Assistant District Engr. Richard Emmanuel Ragragio kan 3rd Engineering District kan DPWH sa Baras, Canaman, Camarines Sur nagpahayag na igwa na sindang notice to proceed (NTP) sa mga kontratista alagad dai makabalik an mga trabajador mantang kaipuhan magkua muna sinda nin medical certificate nganing maseguro an salud  contra sa coronavirus disease (Covid-19) asin travel permit kun hale pa sa ibang  banwaan. 


Afuera pa kaini, dapat igwang ibubugtak na kuwartel an kontratista nganing dai na magparapuruli para makalikay  an  mga trabajador sa deadly virus asin iba pang health protocol na pinapa-implementar kan Inter-Agency Task Force asin kan DOH.


An Department Order numerado 39 hale sa central office kan DPWH nagmamando na dapat sunodon an mga safety guidelines nganing ipadagos  an mga proyecto sa infrastractura bako lang sa obras  publica  envez maging sa mga pribadong patrabajo.


Sa  Ciudad  nin   Naga, segun sa 3rd Engineering District kabale sa napependiente iyo an pigpupunan nang road widening project sa Magsaysay road hasta sa rotunda kan Concepcion Grande asin road widening project sa M.T. Villanueva Ave.


An M.T. Villanueva Ave, dating Liboton Street labi nang sarong taon na-aabala an konstruksyon huli kan dai nagcocooperar an mga may pribadong propriedad nganing gabaon an ulang na mga estractura mantang yaon na sa laog kan road right of way asin nadagdagan pa kan lockdown na pigpasunod kan gobierno sa mga lugar na pigdeclarang Enhanced Community Quarantine (ECQ).


Kabale na digdi an dai napuputol na mga darakulang kahoy asin abalang relocation kan mga poste kan Casureco II.


Sa ibang mga banwaan pigpapadagos na an mga proyecto, alagad huli kan maduwang bulan na lockdown ciertong dai matatapos base sa target completion. (dpa)
 

Share on Facebook
Share on Twitter
Please reload