2 LGUs sa Bicol nagtataong subsidiya sa crudo kan PUJs

Ciudad nin Legazpi – Duwang local na gobierno sa Bicol iyo sana an nagtatabang sa sektor nin transporte sa paagi kan aldiyang pambakal nin crudo sa mga nagkakayod na pampasajerong jeepney (PUJs).

An LGU kan Tiwi, Albay nagtataong aroaldaw na subsidiya nin cantidad P500.00 asin LGU kan Sorsogon, Sorsogon igwa man nin cantidad P200.00 sa cada aldaw na pagkayod alagad para sana sa mga nagkakayod na igwang special permit na pig-isyu kan Land Transportation Franchising and Regulatory Board (LTFRB).

Ini an mga pahayag ni Ramon Rescovilla, Bicol secretary general kan Concerned Drivers and Operators-Pinagkaisang Samahan ng mga Tsuper at Operator Nationawide (Condor-Piston) asin ini dakulang tabang sa mga tsuper mientras na apektado pa an saindang pagkayodnin huli ta limitado an lunad na pasajeros nin huli kan ‘’social distancing’’ na pigmamando sa sainda kan Land Transportation Office (LTO).

Maabot sana sa treinta por ciento kan labi sa otso mil na PUJs sa rehiyon cinco tinawan nin special permit asin ini mapasado sa Hulyo 15, 2020, sabi pa ni Rescovilla.

Hagad man kan Condor-Piston sa iba pang mga LGU sa Bicol na tawan man nin subsidiya sa crudo an PUJs siring kan ginigibo kan mga local na gobierno kan Tiwi asin Sorsogon.

Nagtutubod sinda na kun kaya ngani kan duwang LGUs, ano ta dai man iimplementar kan iba pang mga local na gobierno sa Kabikolan.

Sinabi pa kan opisyal kan Condor-Piston na an saindang grupo naghahagad na kan kaparejong subsidia sa govbierno provincial kan Albay alagad daing gayo natawan nin considerasyon mantang pig-prioridad ninda na matabangan kan kan Capitolyo Provincial kan Albay na eendorsar an saindang PUJs na ma-isyuhan na nin special permit kan LTFRB.

An tarifa sa saindang pagkayod aroaldaw na saindang pigkasurondoan iyo an 60 por ciento sa operator asin 40 por ciento sa tsuper.

Mas nakakabentaje an tsuper sa duwang banwaan huli ta may subsidiya kan nakakasakop nindang LGU.

An grupo nagpahayag na dai pa sinda nagbabago sa kahurotan sa gobierno na ibasura na an planong implementasyon kan jeepney modernization. (dpa)