Online enrollment epektibo, dapat gibohon na cada taon

June 19, 2020

An principal kan Camarines Sur National High School (CSNHS) nagtutubod na puedeng i-adaptar giraray kan Department of Education (DepEd) an online enrollment sa mga maabot na enrollment period  nin huli kan positivong resulta mala ngani sa saindang escuelahan sa laog sana kan ika-tolong semanang pagpalista nagsakat sa 87.5 por ciento an saindang enrollees.  


Sa entrevista ki Principal Sulpicio Alferez III, sinabi kaini na kun siya an hahapoton pabor siya na ipadagos na an online enrollment sa mga masunod na school year mantang magian sa parte kan mga magurang estudiantes maging kan escuelahan.


Madali an paglista dai na kinakaipuhan magsuroksukan an mga magurang o estudiantes na mapasiring sa mga escuelahan ngani sanang magpa-enroll asin makakatipid pa sa oras asin viaje na magastos pa sa pamasaje.  


Sa pinakahuring record kan CSNHS sagcod kasuodma igwang 10,290 enrolles kumpara sa dating 11,760 enrollees kan nakaaging school year asin ini nag-abot na sa 87.5 por ciento.


Sinabi pa ni Alferez na matatapos man lang an enrollment sa Hunyo 30 posibleng maglangkaw pa an numero kan mapalistang estudiantes bako lang hali sa Ciudad nin Naga envez maging si hali sa pagtaraigdna municipalidades.


Sa record man kan DepEd Naga, sinabi ni Schools Division Supt. Manny De Guzman sa cuarentang mga public school sa ciudad igwa nang labi sa 27 mil asin sobra na sa 50 por ciento kumpara sa enrollees kan nakaaging school year na 49 mil.


An online enrollment pig-iimplementar ngonian na taon kan DepEd nin huli sa coronavirus disease nganing ibitaran na muna an face-face enrollment.


Maging sa burokasan nin klase sa Agosto 24 an direktiva kan saindang opisina central mayo nang mangyayaring face-to-face learning envez blended learning asin home school. (DPAureus)

 

Lomang edificio kan Camarines Sur National High School dating Provincial School kan taon 1902 kan Nueva Caceres na ngonian Ciudad nin Naga, temporaryong nagsara kan magsakyada an mga Japon sa Filipinas alagad nabuelta an escuelahan kan 1945 asin naging CSNHS kan Hunyo 21, 1969 sa virtud kan Acta Republica 5529. (DPAureus)

Share on Facebook
Share on Twitter
Please reload