Pagpalista sa public schools sa Bicol, nagsakat na sa 40%

June 19, 2020

Sa laog nin duwang semanang remote enrollment sa mga escuelas publica nagsakat na sa cuarenta por ciento an nakapalista sa anom na provincias kan Kabikolan.


Si Director Guilbert Sadsad kan Departamento de Edukasyon (DepEd) sa Bicol nagpahayag labi na sa 700 mil na estudiantes puon sa kindergarten, elementarya asin sa segundarya an nakalista na puon kan Hunyo uno sagcod sa ngonian asin saindang piglalaoman na makukua man giraray si dating enrollees na 1.8 milyon kan nakaaging 2019-2020 school year.


Sa memorandum kan DepEd an enrollment matapos hasta sa Hunyo 30 asin si premirong semana pigtalaan sa online enrollment asin ngonian na ika-duwang semana iyo na an face-to-face enrollment o drop box enrollment na an mga forma makukua sa mga barangay.


Sa mga magurang na mapasiring sa barangay nganing magkua nin enrollment form pacil na sa sainda nganing dai na magpasiring sa escuelahan puedeng magpasiring nalang sa barangay hall.


Digdi ninda ihuhulog an pig-file up na forma asin igwang personajes kan DepEd nganing regular na ma-monitor asin madara sa escuelahan.


Alagad piglinaw kan DepEd dawa saindang iimplementar an drop box enrollment ipapadagos man giraray an remote enrollment.


Naging paborable ngonian sa mga magurang an bagong sistema sa enrollment kaya halangkawan an turn out, sabi pa ni Sadsad.


Ini bilang pagsunod ninda sa policia kan inter-agency task force nganing malikayan na magsuro-soan sa mga escuelahan an mga magurang para mag- pagpalista sa pagdulag sa ‘deadly virus’’.


Dawa maglangkaw pa an enrollees sa masunod na school year 2020-21, ciertong dai na magkukulang-kulang an mga classrooms.


An burokasan nin klase sa escuelas publica piglalaoman na dai na mabagong petsa nganing dagos na sa Agosto 24, 2020.

Share on Facebook
Share on Twitter
Please reload