SA FESTIVIDAD NI INA: Manga actividad kan City Hall, cancelado na
Sa tahaw kan coronavirus disease (Covid-19) pandemic, nagdesisyon na an lokal na gobierno kan Ciudad nin Naga na cancelaron na an darakulang actividades sa maabot na Peñafrancia fiesta na kinababalihan kan Miss Bicolandia Beauty Pageant, Military Parade, Civic Parade asin Drum and lyre.
Si Consejal Salvador ‘Buddy’ Del Castillo, pamayo kan Committee on Military Parade nagpahayag sa entrevista kan Bicol Mail na ini an saindang pinagkasurondoan sa ginibong executive meeting kan Martes, Hunyo 9 na presente si Alcalde Nelson Legacion, Bise Alcalde Nene De Asis asin mga miembros kan Sangguniang Panlungsod.
An mga actividades na ini pigdudumog nin ribo-ribong bisita mantang an military parade saro na sa problema nin huli ta inaabut nin labi sa sampulong oras sagcod sa awarding ceremonies.
An problema sa ‘’social distancing’’, paggamit nin face mask, maging kan health standard imposibleng ma-implementar kun idadagos an darakulang actividades kan City Hall sa Septiembre 2020.
Naglilikay an ciudad sa ‘’deadly virus’’ baka iyo pa ini an maging causa mas marhay pang cancelaron na, sabi pa ni Del Castillo.
Kun mayong participasyon an ciudad sa Peñafrancia fiesta deretso kan City Hall na magcancelar huli kan mayor na isyu sa salud asin dapat igalang an ‘’separation of state and church’’.
Saro sa pighalimbawa kan consejal kun idadagos an Miss Bicolandia Beauty Pageant alangan man an mga candidata nakasulot nin face mask maging an problema sa ‘’physical distancing’’ sa JMR Coliseum kaparejo man an isyu sa military asin civic parade asin drum and lyre.
Sagcod sa ngonian mayo pang na-iimbentong pambakuna laban sa Covid 19.
Bako lang ini an mayor na isyu alagad kabale pa digdi an paghigot paja kan City Hall mientras na aabuton nin nieve (9) milyon pesos naman an bubutasan na fondo sa mga actividades kan Festividad ni Ina.
Tikapo na sa fondo an ciudad mala ngani magkakaigwa nin pagkulang-kulang an annual budget ngonian na taon huli ta aabuton sa P300 milyon an dai makukulekta sa buwis epekto kan enhanced community quarantine (ECQ) asin general community quarantine (GCQ).
Sinabi pa ni Del Castillo, dakul na mga negosyante an apektado kan lockdown na resulta kaini apektado man an saindang pagbayad nin buwis sa ciudad.
Bako lang an sektor kan negosyante maging an City Hall mala ngani bagsak man an koleksyon sa Bicol Central Station, slaughter house asin Naga City People’s Mall. (DPAureus)