Bicol mayo pang modernong PUVs

June 26, 2020

 Modernong PUV sa Metro Manila pa sana nagkakayod.         (Topgear)

 

 

An rehiyon Bicol dai kabale sa mga lugar na madudugangan an mga pampasajerong vehiculos nganing magkayog puon kan Lunes, Hunyo 22 mantang an tinutogotan sana kan Inter Agency Task Force iyo an modernong public utility vehicles (PUVs).


An  dahilan mayo pa digdi sa Bicol kan modernong PUVs asin an tinutogotan sana si mga nakakua nin special permit sa Land Transportation Franchising and Regulatory Board (LTFRB) na mapaso na sa Hulyo 15, 2020.


Kun igwa man kaining mga unit yaon  sa Metro Manila. 


Ini an mga pahayag ni Ramon Rescovilla, Secretary General kan Concerned Drivers and Operators-Pinagkaisang Samahan ng mga Tsuper at Operator Nationwide (Condor-Piston) sa kamawotan kan saindang pag-iriba na magbuelta sa tinampo sa paghanap buhay alagad limitado sana an na isyuhan nin special permit kan LTFRB.


Bako lang an sektor nin transporte an apektado maging an regular na mga commuters aroaldaw na naghahanap buhay.


Sinabi pa ni Rescovilla sa provincia nin Albay asin Sorsogon nasa treinte por ciento sana an nagpapasada asin sa iba pang mga provincia sa Kabikolan kulang pa an natatawan nin permit kan LTFRB.


Pighalimbawa sa Calabanga, Camarines Sur na igwang rehistradong 80 PUJs alagad sampulo sana an natawan nin special permit.


Saro sa magabat na rekisitos kan LTFRB na ma-iisyuhan sana nin special permit si mga PUJs na rehistrado bilang stock cooperative sa Cooperative Development Authority o kun dai man nagbilog bilang korporasyon.
  Saindang pigkukundenar an estrictong pulisiyang ini kan Department of Transportation (DOTr) nganing iimplementar na an pagkayog sana kan mga modernong jeepney asin si lomang jeepney ibabasura na.


Dai kaya kan sadit na mga operator an P2 milyon hasta P3 milyon na presyo kan modernong jeepney asin an mangyayari kaini luway-luway na gagadanon kan gobierno an pagbuhay kan mga saradit na operator asin tios na tsuper asin matatawan sana nin pabor digdi si mga darakulang korporasyon na kaalyado kan administrasyon,  sabi pa kan lider kan sektor nin transporte.


An intensyon kan LTFRB si mga PUJs nganing mapiritan an mga operator na mag-consolidate sa cooperativa o sa korporasyon dai na ma-renew  kan franquicia kabale si mga UV express van na labi nang katorce años.


Sinabi pa kan Condor-Piston na sagcod na sana sa Deciembre 31, 2020 an talaan kan LTFRB nganing iimplementar an modernong jeepney.

Share on Facebook
Share on Twitter
Please reload