Naga City, 72 yrs. old saka Bicol Mail, 17 yrs., magturugang sa pagtubod

June 26, 2020

 

An estorya kan ciudad nin Naga, Ciudad de Caceres sa laog nin poco mas o menos  500 na taon, ika-tolo sa pinaka-enot na ciudades sa Pilipinas, sunod sa Manila asin Cebu asin bistado sa pangaran na Naga hali sa tataramon na Narra,na sarong kahoy na dakul nagtuturubo sa lugar na ini kan taon 1521 kan mag-abot si Magellan sa Cebu. An Naga na naguin Cavesera kan Camarines Sur o an dating Ambus Camarines, pinakadakulang provincia sa enterong Kabikolan. 


An Bicol Mail an solamenteng pan-relihiyon na diyaryo kan Kabikolan.


Sa ibong na lado an diyaryong Bicol Mail na an enot na publisher iyo an lider kan mga guirelya kan tiempo Hapon na si Leon S. Aureus kan Libmanan, iyo an enot na alkalde kan Naga paka-Liberation poon kan 1948.


Maski ngani an enot na Bicol Mail na pigmukna ni Mayor Aureus kan 1953 alagad pinasara kan Martial Law kan 1972 pakalihis nin 20 anyos kan 2002 Hunyo 18, binuksan liwat an presenteng Bicol Mail kan sobreno ni Mayor Leon na si Nilo P. Aureus kan Hunyo 18 kan taon na idto.


An historian na si Prof. Danilo M. Gerona Ph.D. iyo an pinaka-enot na editor-in-chief, ikaduwa idtong Levy Aureus, sikat na burukrata sa departamento de trabaho asin famusong parasurat asin humorist an naguin ikaduwang editor katabang si Alan Pelayo na saro man partidaryo, an nagburukas kan ikaduwang Bicol Mail.
An iba pang naguin editors si Jose Perez na konsehal na ngonyan sa Naga asin si  Juan Escandor Jr. kan Sorsogon, dating Bikol correspondent kan Philippine Daily Inquirer, asin sa presente si Ed Yu, an parapahayag kan National Irrigation Administration.


20 anyos si pag-ultanan kan pagsara kan daan na Bicol Mail kan September 1972 asin June 18, 2002 kan an ciudad nin Naga nagcelebrar sa primerong pangyayari kan charter anniversary (tnx to Jo Obias) sa petsang ini.


Dati kaya an celebrasyon kan charter anniversary December 15 poon  kan 1948 kan maipasar an Naga City charter kaidtong congressman Juan Q. Miranda.


Pinirmahan palan an ley kaidtong depuntong Prsedente Elpidio Quirino kan Hunyo 18, 1948.


An banwaan na Pili naguin opisyal na cavesera kan 1955 kan maipasar an ley ni Congressman Felix A. Fuentebella kan Partido. Formalmente naribayan an Naga bilang cavesera kan Camarines Sur. Poon kadto an mga taga Naga dae na nagboboto sa mga opisyales kan Camarines Sur asin ta an budget kan Naga dae na pig-aaprobaran kan gobernador kan provincia. An rason daa political, segun ki depuntong Naga Times publisher/editor na si Ramon Tolaram. 


An Naga deklarado na zona nin katuninungan, may sadering Plaza Rizal Freedom Park, may pinakadakul asin pinakalibreng prensa asin broadcast media antes, pakatapos kan Martial Law asin maski sagkod ngonyan.


An Naga iyo an centro kan Kabikolan, pinakaprimero asin pinakadakulang ciudad, centro nin relihiyon, kultura asin komersyo, enot na Regional Center kan Kabikolan sagkod 1976.


Sa parte man kan Bicol Mail, an kagpundar kaini na si Mayor Aureus, orgolyo kan Libmanan, pinakadakulang banwaan kan Camarines Sur, miyembro kan pamilyang bistadong mga lideres kan Tankung Vaca Guirella Movement asin kan mga maiisog na veterano kan naka-aguing giyera sa Bikol. 


Pero kan siya an may kapot kan Bikol Mail kan siya nabubuhay pa, an diyaryo napili bilang National Awardee como best edited asin most objective kan Philippine Press Institute o PPI sa laog nin 20 anyos kaya lugod pinag-initan kan panahon kan Martial Law (an mga naguin editors kaidto si Francis Nacianceno, Stephen Sergio, Alfonso Ocampo, Leonor Aureus).


An Bikol espelyalmente an Naga an lugar ni VP Leni iyo ngonyan an centro kan oposisyon sa presenteng administrasyon. Kasurog man siyempre an Bicol Mail.


Sa okasyon kan sabay na aniversaryo kan Naga Charter asin Bicol Mail Part II, an samuyang pagpaabot nin pag-omaw sa gabos na taga Naga asin sa gabos na nasa likod asin parabasa kan Bicol Mail.


****
Sa gabos na Hermanos asin Hermanas kan Sarong Banggi International Organization asin Naga Sarong Banggi, ngonyan an pinakamamundong parte sa 50 anyos na estorya kan organisasyon ta 3ng mga pusog na harigui an nagtaralikod sa kinaban: si Engr. Salvador “Babet” Perez, Engr. Leon Reyes asin Kapitan Jojo Villafuerte nagtalikod sa kinaban haros sarabay sa laog nin sarong semana.


Nagpapaabot nin pakikidumamay asin pangadgion an gabos na SBOI members sa anom na provincias asin pitong ciudades kan Bikol, Los Baṅos Laguna, Kamaynilaan, asin iba pang parte kan nasyon pati sa abroad sa Amerika, Middle East, Europa, Australia asin iba pa.

Share on Facebook
Share on Twitter
Please reload