SA PEÑAFRANCIA FIESTA 2020: Prusisyon ki Ina cancelado na

June 26, 2020

Suportado kan Committee on Health  

 

Tama sana an desisyon kan Archidiocesis nin Caceres sa Ciudad nin Naga na cancelaron na ngonian na taon an tradisyonal na traslacion asin fluvial procession ki Nuestra Señora de Peñafrancia asin Divino Rostro para sa proteksyon kan salud kan ginatos na ribong devotos  asin turista na masungko sa kapiestahan ni Ina sa bulan nin Septiembre.
 

Sagcod sa ngonian mayo pang nadidiscobreng bakuna contra sa coronavirus disease (Covid-19) pandemic mala ngani padagos pang naglalangkaw an caso kan deadly virus.


Si Consejal Sonny Rañola, sarong doktor asin pamayo kan Committee on Health sa Sangguniang Panlungsod nagpahayag kaini kasunod kan kumfirmasyon na iginilid ngonian na taon kan simbahan an dakulang mga actividad sa kapiestahan kan Bikolandia maging an lokal na gobierno cancelado na an dakulang mga actividad na kinababalehan kan regional military parade, Miss Bicolandia beauty pageant contest, civic parade asin drum and lyre.


Bilang doktor dapat lang igilid na muna an mga darakulang actividades nin huli ta dificil masunod an health standard kan Department of Health huli kan pandemya kun magruso na sa traslascion asin fluvial procession an ribo-ribong turista asin devotos ni Ina asin an simbahan maging an City Hall iyo pa an basulon kan Inter-Agency Task Force (IATF) kun magkalat an virus.


An desisyon kan simbahan ipapadagos man giraray kan devotos an siyam na aldaw na nobenaryo ki Ina sa Naga Metropolitan Cathedral asin sasabayan man ini kan mga parokya sa manlaen-laen na banwaan sa Camarines Sur.


An aldaw kan nobenaryo ki Ina puede man sabayan kan mga familia sa harong kun dai na makaka-atendir sa simbahan huli kan pig-iimplementar na ‘’social distancing’’ asin health protocol kan IATF, sabi pa ni Rañola.


Siya iyo pa an pamayo kan Committee on Tourism sa sangguniang nagpahayag na huli kan pandemya dakul na mga establisimiento de comercio an apektado siring kan mga hotel na dating bulan palang nin Hunyo dakul na an mga nagpapa-reserba sagcod na enterong okupado alagad mapungaw sa ngonian mantang kulang an mga parokyano.


Kan mga nakaaging taon 2019 bulan palang nin Agusto ribo-ribo nang mga bisita asin turista an nagpapasiring digdi sa Ciudad nin Naga alagad huli kan paglikay kan mga tawo sa virus habo na munang mag-viaje.


Sa Arts Culture and Tourism Office (ACTO) kan City Hall sinabi Alec Francis Santos, jefe kan opisina puon pa kan Enhanced Community Quarantine (ECQ) apektado na an industria nin turismo mala ngani nagbagsak nin 75 por ciento.


Sa datus kan 2019 nag-aabot sa 1.5 milyon alagad ngonian nasa 400 mil an dahilan iyo an pandemya. (dpa) 

Share on Facebook
Share on Twitter
Please reload