MGA MAGURANG NAAALARMA SA COVID-19: 66.57% sana enrollees sa CS

July 3, 2020

Pili, Camarines Sur – Kun dai na pinalawig kan Department of Education (DepEd) an enrollment period asin tinapos sana kan Hunyo 30, 2020 nagsakat sa 299,564 an total na nagpalista sa elementarya asin segundarya o 66.57% kumpara sa 450,000 na enrollees kan school year 2019-2020.

 

An causa posibleng habong isugal kan mga magurang an saindang mga aki sa nakaka-alarmang coronavirus disease (Covid- 19) pandemic.

 
Alagad sinabi ni School Division Superintendent Loida Nidea kan DepEd Camarines sur an desisyon kan saindang opisina central na palawigon pa hasta Hulyo 15, 2020 an pagpalista kan mga escuela nin huli ta an hababang enrollees bako lang nangyayari sa Camarines Sur maging sa nasyonal asin iba pang rehiyon na mayor na isyu iyo an Covid 19.


Target kan saindang opisina rehiyonal na mapalangkaw an enrollees na dakulang bagay an tinao pang panahon nganing madagdagan an numero kan mga estudiantes mantang an pag-adal importanteng marhay sa futuro kan mga jovenes.


Sa datus hasta kan Hunyo 30  sa elementarya igwa nang nakapalistang 91,015; junior high school – 76,818; asin sa senior high school – 31,731 asin ini igwa sanang total na 299,564.


Nabaliktad an halabang nagpapalista sa mga public school kan mga nakaaging school year kan mayo pang krisis sa salud mala ngani cada school year nalangkaw nin tres por ciento an enrollees.


Nagdagsa si mga magurang na ipalista an sindang mga aki kan huring aldaw kan Hunyo 30 kan dai pang kumfirmasyon kun papalawigon an enrollment hasta sa Hulyo 15 mala ngani base sa datus kan Hunyo 29 hapon nag-aabot sana sa 41 por ciento si enrollees.


An enot na duwang semana kan pagpalista pinapaagi sa online enrollment alagad sa mga huring semana pig-implementar an drop box enrollment.


An burokasan nin klase pigtalaan sa Agosto 24, 2020 asin mayo nang mangyayaring face-to-face learning envez online classes sa mga estudiantes na may gadget asin modular instruction na magamit nin printed materials an estudiantes.


Napag-araman pa sa DepEd na mayoria man giraray na mga estudiantes an maklase sa paagi nin modular learning.


Mientras tanto, sa pribadong escuelahan sa elementarya igwa sanang nakapalista nin 2,728; junior high school – 3,995; asin sa senior high school – 2,877.  (DPAureus)       

Share on Facebook
Share on Twitter
Please reload