SA SURVEY KAN DepEd NAGA 10% sana kan mga estudiante makakaatendir sa online classes

July 3, 2020

Hababaon an numero kan mga estudiantes sa mga escuelas publica sa Ciudad nin Naga an makaka-escuela sa paagi kan online classes sa school year 2020-2021 base sa inisyal na survey nag-aabot sana sa diez por ciento.


Si Dr. Manny De Guzman, OIC City School Superintendent kan School Division kan Department of Education (DepEd) sa Ciudad nin Naga sa ginibong nindang inisyal na survey  maabot sana sa diez por ciento nin mga estudiantes an igwang gadget asin internet connection asin sinda an puedeng maka-atendir sa online classes.


An survey ginibo kan DepEd Naga mantang nag-aandam an 40 mga public schools digdi para sa burokasan nin klase sa Agosto 24, 2020.


Sa numero kan mga enrollees hasta kan Hunyo 29 nagsakat na sa 75 por ciento an nakapalista sa escuelas publica alagad sa pribadong mga escuelahan nag-aabot sana sa 22 por ciento.


An 75 por ciento pigbasehan sa 49,299 na enrollees kan nagtalikod na school year asin nag-total sana sa 37,066 sa elementarya, junior high school asin sa senior high school. 


Sa pribadong escuelahan sa 22,542 na total enrollees kan nagtalikod na erescuelahan igwa sanang nagpalistang 4,847 o nag-aabot sana ini sa 22 por ciento.


Sa masunod na school year dai na muna tinutugot kan DepEd an face-to-face learning huli kan coronavirus disease alagad huli kan resulta kan survey mas mayoria man giraray an nagpapabor para sa modular instruction na kaipuhan an mga printed materials.


Sinabi pa ni De Guzman sa ginibong miting kan Naga City School Board na pinamamayohan ni Alcalde Nelson Legacion mapaluwas nin fondo para sa internet connectivity nganing mag-instelar nin wifi connection sa mga escuelahan alagad igwa man sa  cada barangay na igwa nang ginigibong negosasyon nganing hale naman sa tabang na fondo kan barangay government.


Nin huli ta diez por ciento sana an puede sa online classes mas tatawan nin dakulang fondo hale sa school board an para sa modular instruction na kaipuhan an mga printed materials na kaipuhan kan mga estudiante.


Piglalaoman an total enrollees  madugang pa mantang pinalawig an enrollment hasta sa Hulyo 15, 2020.  (dpa)

Share on Facebook
Share on Twitter
Please reload