DPWH nakabuelo pagputol kan mga kahoy

July 10, 2020

Grupo kan environmentalist mayo nang cuestion sa pagpurutol kan mga ulang na puon nin kahoy sa pig-iimplementar na road widening projects kan DPWH.  (dpa)  


 

Makakabuelo na an Camarines Sur 3rd Engineering District kan Department of Public Works and Highways {DPWH} sa saindang napendienteng road widening project sa Carolina-Panicuason matapos punan na an pagpurutol kan mga gurangan nang kahoy.


Pigpunan kan kontratista an pagputol kan sampulong mga puon nin kahoy sa San Felipe Section nganing mahawanan an hayapit na tinampo para sa tertiary roads.


Si District Engr. Rebecca Roces na-isyuhan na nin special tree cutting permit kan Department of Environment and Natural Resources (DENR-CENRO) kan Ciudad nin Iriga an saindang opisina alagad antes sinda nagpurutol kan mga kahoy nagbugtak muna nin bulletin board na nagpapaisi sa publico na awtorisado na sinda kan ahencia na magputol nin mga kahoy na ulang sa road widening project.


Nakasurat sa bulletin board na igwa na sindang STCP Permit No. 2020-008-DPWH na pig-isyu kan DENR para sa sampulong puon nin kahoy sa San Felipe section kan Carolina-Panicuason development widening of tertiary roads sa Naga.


An proyecto kan obras publica labi nang duwang taon an nakakaagi naabala an dagos-dagos na implementasyon kan road widening project matapos cuestionon sa corte  an pagpurutol sa mga kahoy kan grupo nin environmentalist na pigrepresentaran ni Abogado Reiz Macaraig sagcod pinaboran kan jusgado asin nag-isyu nin Temporary Environmental Protection Order (TEPO) kan Septiembre 28, 2018 pabor sa demandante.


Alagad kan Deciembre 2018 an Regional Trial Court (RTC) Branch 62 ibinaba na an TEPO  sa natatadang 26 na dai pa napuputol na mga kahoy sa laog kan road widening project kan DPWH sa San Felipe-Carolina-Panicuason road, kasunod kan ‘‘amended compromise agreement’ (ACA) sa pag-ultanan kan duwang lado na inaprubaran kan corte kan Deciembre 16, 2019.


Nag-aandam na an DPWH sa pagpurotol kan darakulang mga kahoy kan Marso 2020 alagad iginilid sagcod na abala an proyecto matapos abuton kan enhanced community quarantine (ECQ) asin ngonian sana pigpunan. 

                                                     
Sa ngonian mayo nang angal an grupo kan environmentalist asin ipapadagos na kan DPWH an naabalang proyecto. (dpa)
     

Share on Facebook
Share on Twitter
Please reload