Simbahan ipapa-lockdown oras na magruso an mga may ‘panata’ ki Ina

July 10, 2020

Dawa cancelado na kan Archidiocesis nin Caceres asin kan lokal na gobierno kan Ciudad nin Naga an saindang mga actividad sa maabot na Peñafrancia fiesta alagad an ciudad nakaandam an seguridad sagcod na mag-imponer nin lockdown sa simbahan oras na magruso an may mga ‘’panata’’ ki Nuestra Señora de Peñafrancia.


Macoordinar an City Hall sa Naga City Police Office (NCPO), sagcod na mag-lockdown sa Basilica Minore asin sa simbahan kan Peñafrancia oras na magpumirit an ginatos na grabe an pagtubod sa paagi kan saindang ‘panata’ ki Ina.


Ini an mga pahayag ni Alcalde Nelson Legacion mantang igwa na sindang joint declaration kan simbahan asin kan ciudad na cancelado na an gabos nindang mga darakulang actividades nganing makalikay sa padagos na paglangkaba kan coronavirus disease (Covid 19) pandemic.


Sa lado kan Arhidiocesis nin Caceres cancelado na an tradisyonal na traslacion asin fluvial procession, Dawn, Perdon Harubay, asin ano man na klaseng prusisyon.


An City Hall, cancelado na an gabos na commercial activities siring kan Voyadores Festival, Civic asin Military Parades, Trade Fair, Exhibits, Competitions asin iba pang darakulang pagtitiripon.


Afuera kan planong lockdown dai nahahale an posibilidad na magbugtak giraray nin checkpoint kun ini kinakaipuhan, sabi pa kan jefe ejecutivo.


Naiintindihan kan alcalde na magabat an desisyon kan simbahan asin kan ciudad lalo na si may mga ‘panata’ alagad dapat maintindihan an situasyon ngonian sa Covid 19 pandemic.


An tinatawan nin prioridad kan ciudad asin kan simbahan iyo an kaligtasan kan lambang saro laban sa virus na sagcod sa ngonian mayo pang nadidiscobreng bakuna.


Saiya pang sinabi na puede man ipadagos an ‘panata’ sa harong asin magsabay sa siyam na aldaw na nobernaryo ki Ina.


An siyam na aldaw na nobenaryo sasabayan kan gabos na parokya sa Camarines Sur envez kan traslasyon asin fluvial procession.


Sa paagi kaini, dai na kaipuhan na magpasiring sa Ciudad nin Naga, sabi pa kan alcalde.                                                                    
                                (dpa)                    

Share on Facebook
Share on Twitter
Please reload