SA SURVEY KAN DEPED BICOL: Online classes isinisikwal

Ciudad nin Legazpi - Kun dai na ipapasunod kan Department of Education an face-to-face learning sa sunod na school year 2020-21 maabot sa noventa (90) por ciento kan mga estudiantes sa Bicol mas ginugusto an modular instruction na kaipuhan an mga printed materials kumpara sa diez (10) por ciento sa online classes.

Ini sa resulta sa ginibong survey sa rehiyon cinco kan mga paratukdo sa anom na provincias mantang nag-aandam an DepEd sa burokasan nin klase sa Agosto 24.

Si Director Guilbert Sadsad kan DepEd Bicol nagpahayag kaini mantang pataposon na an saindang pinalawig na enrollment period hasta sa Hulyo 15 alagad kun kulang an mga estudiantes nagpapabor sa online classes an saro sa mayor na problema iyo an maluyang serbisyo kan internet connection asin mayong gadget.

Iginilid na muna kan ahencia an face-to-face learning nin huli kan problema sa coronavirus disease (Covid-19) pandemic.

Sa listahan kan DepEd Bicol sa mga nagpapabor sa online classes an Masbate nag-aabot sana sa dos por ciento; Catanduanes – cinco por ciento; Sorsogon – 18 por ciento; Albay – veinte por ciento; Camarines Norte – 15 por ciento; asin an Camarines Sur iyo an may halangkaw alagad nasa treinta por ciento sana.

Segun sa DepEd Bicol katuyohan kan saindang survey nganing mapag-andam kan ahencia an mga learning materials alagad kun dakulang por cientaje an nagpapabor sa modular instructions kaipuhan ninda an tabang kan opisyales de barangay sa pagdistribuer sa mga residencia kan estudiantes kan printed materials.

Maabot sa 1.8 milyon an saindang target enrollees sa public asin private school alagad sa enot na semana ngonian na bulan nin Hulyo igwa nang maabot sa 1,177,000 na enrollees asin ini nasa 73 por ciento.

Kun sa escuelas publica sana an saindang target enrollees 1.6 milyon nag-aabot na 1,024,000 na estudiantes o 64 por ciento na alagad sa pribadong escuelahan igwa pa sanang 30 por ciento alagad piglalaoman na mahabol pa an mga magurang sa ultimo dia kan enrollment sa Hunyol 15.

Enot nang pigtalaan kan Hunyo 1 hasta Hunyo 30 an enrollment period alagad nin huli kan hababaon na por cientaje kan mga nagpapalista pinag-extendir ni Secretary Leonor Briones. (dpa)