DO kan LTFRB ibubuelta sa Naga

July 17, 2020

Ibabalik na an district office kan Land Transportation Franchising and Regulatory Board (LTFRB) sa Ciudad nin Naga matapos kandadohan sa laog nin tolong taon kan mga nakaaging  direktor rehiyonal asin si transaksyon pigbuelta sa opisina rehiyonal sa Ciudad nin Legazpi.

 

 

An bagong  direktor rehiyonal si retiradong Brig. General Antonio Gardiola kan Philippine National Police (PNP) nagpahayag kaini kan siya mag-cortesiya sa oficina ni Alcalde Nelson Legacion sa Naga.


An LTFRB district office sa Ciudad nin Naga dakulang tabang sa manga taga Camarines Sur na igwang transaksyon sa ahencia sa pag-apply nin renewal asin bagong franquicia kan mga pampasajerong vehiculo.
An edificio kan ahencia naconstruhir kan panahon ni dating Congresista James Jacob kan siya maging chairman  kan LTFRB sa katuyohan na matabangan an mga taga Camarines Sur asin Camarines Norte na digdi na sinda magproceso kan mga papeles nganing dai na magastosan asin abala sa panahon sa pag-viaje sa Albay.


Saro sa pigtawan nin duon kan bagong pamayo kan LTFRB Bicol iyo an paglaban sa kurapsyon sa ahencia na haloy nang isyu sa mga nakaaging administrasyon.


Si Gardiola taga Naga, naging City Director kan Naga City Police Office (NCPO) kan panahon ni dating Alcalde John Bongat, naging regional director kan Bicol PNP asin nagkapot nin halangkaw na puesto sa Highway Patrol Group sa National Capital Region. (dpa)                                        
 

Share on Facebook
Share on Twitter
Please reload