Naga City Hospital igwa nang bagong ultrasound

July 17, 2020

An Naga City Hospital na pinapadalagan kan lokal na gobierno kan Ciudad nin Naga nganing mas maging epektibo an serbisyo sa salud sa nagdadakul na mga pasyente aroaldaw igwa nang bagong ultrasound asin ini dagdag sa dati nang ginagamit na makina.


Si Consejal Sonny Rañola, Chairman kan Committee on Health sa Sangguniang Panlungsod asin iyo an responsable sa pagdreno kan Ordinansa numerado 2019-85 na nagtatagama nin P3.5 milyon tanganing ibakal kan sarong unit ultrasound machine para sa City Hospital nagkumfirmar sa Bicol Mail na yaon na sa hospital an bagong makina.

 

Pinapaheling ni Consejal Jose C. ‘Sonny’ Rañola, M.D. kan Sangguniang Panlungsod an bagong ultrasound sa Naga City Hospital na kaipuhan kan mga pasyente nganing masilag tolos an saindang internal na helang. Narealisar an bagong facilidad kan hospital sa paagi kan saiyang pigpadrenohan na Ordinance No. 2019-085.

 


Magagamit an makina para sa pag-monitor  sa ‘‘heart, blood vessels, kidneys, liver, gallbladder, pancreas, bladder,  and other organs and parts of the body’’,  sabi pa ni Rañola.


Afuera pa kaini, an abdominal ultrasound makakatabang sa doktor sa pag-evaluar kan pagparakulog nin tulak, pag-aram sa kidney stones, liver disease, tumors asin iba pang kondisyon.

 

MAYONG RADIATION SA NAGBABADOS

 

Alagad saiya pang dinagdag sa mga nagbabados magagamit pa ini kan mga doktor nganing maaraman an kamugtakan kan feto o ‘’fetus’’ asin an karahayan bakong arog sa x-rays, an ultrasound mayong radiation.


Sinabi pa kan pamayo kan Committee on Health na kaipuhan an dugang na unit kan ultrasound sa hospital mantang an presenting makina limitado sanang  gamiton sa pasyente para sana sa aldaw nin Martes asin Jueves sa oras na alas 7:30 hasta alas 9:30 nin aga.  Nagkaigwa an ciudad sa paagi nin donasyon,  alagad an presenting makina loma asin limitado an pag-aram kan helang internal kan sarong pasyente  kulang an kakayahan na kaipuhan asin maaraman kan doktor.


Sa ginibong pag-aadal ni Rañola an City Hospital nagrerecibe nin 200 na mga out-patient cases sa average aroaldaw, kabale na digdi an mga pasyente sa OB-GYN. Dai pa kabale digdi si mga emergency services na inaabut nin 50 pasyente asin iba pang pasyente na nag-aabut man sa 25 an average aroaldaw kaayon si OB-GYN patients.


Tanganing mas mapaangat an serbisyo sa pagbulong, sa mga pasyente sa OB-GYN, an ‘‘diagnostics’’ an ginibo para maaraman kun igwa pang problema sa salud. (dpa)

Share on Facebook
Share on Twitter
Please reload