Pagduble sa bed capacity kan BMC napapanahon sa pandemya

July 17, 2020

Napapanahon an pagkaka-aprubar kan ‘‘Doubling Bicol Medical Center Bed Capacity’’ na ginibo nang 1,000 kasunod kan pagkulang-kulang na kan mga cuarto para sa mga pasyente sa coronavirus disease (Covid 19).

 Mala ngani si ibang mga pasyente na residentes kan Ciudad nin Naga envez sa facilidad sa Covid 19 sa BMC, dinadara sa Our Lady of Lourdes Infirmary Hospital sa Carolina, Ciudad nin Naga mantang operational naman an Provincial Medical Center kan Capitolyo Provincial kan Camarines Sur.


Sa pinaluwas na press statement ni Senador Francis ‘‘Kiko’’ Pangilinan an pagduble kan bed capacity kan BMC hale sa dating 500 asin ginibo nang 1,000 makakatabang sa pagresponde sa kakulangan na ngonian nin facilidad sa Covid 19.


An Acta Republica 11478, bagong ley na nagduduble sa bed capacity kan hospital makakatabang sa rehiyon sa mga pasyente sa Covid 19.


‘‘This is a timely and welcome intervention, especially now that we are still battling a pandemic’’.


Inabot nin 21 taon na dai nadugangan an bed capacity kan BMC ngunian dakul nang namamanuan an matatabangan sa serbisyo sa salud huli kan bagong ley, sabi pa kan Senador.


Si Pangilinan, na nagplantiar kan Senate Bill 640 o an ‘‘Act increasing the Bed Capacity of BMC’’ kan Hulyo 22, 2019, iyo an principal author asin si Senador Bong Go.


An counterpart na padreno kan bill sa Camara-Baja iyo si Congresista Gabby Bordado kan tercer distrito kan Camarines Sur, siya an orihinal na padreno kan bill kan 17th Congress sagcod nakalusot sa congreso alagad inaabut nin recess sa Senado mantang magkakaigwa na nin eleksyon. 

 

Saiyang pigplantiar liwat an bill kan 18th Congress alagad igwa man kaparejong version na House Bill si Congresista LRay Villafuerte kan segundo distrito kan Camarines Sur asin an kaparejong bill pigsararo na sana kan Committee on Health.


Kan taon 1998 pa, 500 an bed capacity kan hospital. Kan nakaaging taon sa report kan manijamiento kan BMC nag-aabut na sa 850 an daily average kan piglalaog na mga pasyente.

 

Pinasalamatan man kan senador an saiyang pag-iriba sa senado asin sa Camara-Baja na mapadale an pag-aprubar kan bill na pinangenotan ni Congresista Bordado nganing matabangan an saiyang kahimanwa sa Bicol. (dpa)
 

Share on Facebook
Share on Twitter
Please reload