HULI SA DESTROSO SA POSTE, LINYA: Casureco II masangat nin caso civil vs Telcos

July 24, 2020

Nagkaperang mga poste kan Casureco II pinalakma bako kan bagyo envez nasabitan kan PNR train hale sa Metro Manila an mga nakalaylay na linya kan Telcos asin Cable TV. (R.Bucay)         

 

 

Posibleng magsangat nin caso civil an manijamiento kan Camarines Sur II Electric Cooperative (Casureco II) sa nagkaperang mga companya nin telepono (Telcos) asin Cable TV sa ilegal na pagkabit kan saindang mga linya nin kable sa mga poste kan cooperativa na naging causa nin dakulang destroso kan hatakon kan nagdadalagan na PNR train an saindang mga nakalaylay na linya sagcod nagkaturomba an pitong poste daog pa an paglamasa nin makusog na bagyo.


Afuera pa kaini, naging causa nin tolong aldaw na pagkakapatod kan suplay nin kuryente sa 400 na mga residencia sa apektadong lugar kan Sitio Greenland, Concepcion Pequeña.


Nagkapera nang Telcos pigngaranan iyo an PLDT, Dito, Globe, sa cable TV kinababalehan kan Converge asin DZTV.


Si Rinner Bucay, opisyal na parataram kan Casureco II nagpahayag  sa  Bicol Mail na pinapaadalan na ni OIC General Manager Emerlita Candia sa saindang legal counsel an pagsangat nin caso sa dakulang destroso bako lang sa mga nagkapurotol na poste maging an mga propriedad kan cooperativa arog kan primary line, secondary line, service drop wire, pagkaraot kan transformer asin mga metro.


Sinabi ni Bucay na kadakle kan mga Telcos, internet line asin Cable TV company nakabit kan saindang mga linya sa poste kan Casureco II na dai lamang nagpapaisi. 


An ibang Telcos igwang contrata sa cooperativa sa pagkabit kan saindang linya asin nagbabayad nin arkila na P420 cada poste sa laog nin sarong taon alagad an iba basang nalang nagkakarabit na iyo an nakakapagabat sa poste na nagiging causa kan pagkaturomba kun may calamidad.


An pagbagsak kan mga poste asin linya kan Casureco II nangyari kan Hunyo 22 kan mag-agi an train na may lunad nin mga Locally Stranded Individuals (LSIs) haling Metro Manila.  Makusog an dalagan kan train kan abuton asin hatakon an mga linya kan Telcos asin cable TV.


Maging si CCTV Camera sa barangay hall kan Concepcion Pequeña asin suplay nin kuryente an nadestroso kan makaayon sa mga hinatak kan train.


An Barangay Council sa pamamayo ni Punong Barangay Wenwen Regmalos naghagad nin asistensya finansyal sa Telcos asin Casureco II mantang apektado an saindang mga wire asin cable kan CCTV camera.
Dinagdag pa ni Bucay na nagkaperang mga ilegal na pagkabit kan Telcos sa saindang mga poste hinahagadan nin paliwanag alagad dai man nagsisimbag. (dpa)      

Share on Facebook
Share on Twitter
Please reload