Operasyon kan duwang edificio sa BMC tinututokan kan OPABA

July 24, 2020

An operasyon kan bagong mga edificio kan 5 storey asin 8 storey kan Bicol Medical Center (BMC), saro sa tinututokan kan Office of the Presidential Adviser for Bicol Affairs (OPABA) tanganing makatabang sa pangangaipo kan mga Bicolano sa serbisyo nin salud lalo na sa coronavirus disease (Covid 19) pandemic.


Sobra sa on bilyon pesos an ginastos kan gobierno sa kontruksyon kan mga edificio asin kaipuhan lang resolberan na an mga depekto sa proyecto nganing gabos na escalon maokupar kan mga pasyente asin igwang kumpletong facilidades sa mga laboratoryo.


Ini an pigtawan nin duon ni Usec Marvel Clavecilla kasunod kan ginigibong aksyon kan saiyang opisina sagcod na patanidan an Cuerpo Construction na dapat taposon na sa lalong madaling panahon an mga minor defect kan duwang edificio.


Aprobado   na ni Presidente Rodrigo Duterte an bill kan Camara-Baja asin senado nganing gibohon nang 1,000 an bed capacity kan pinakadakulang hospital sa Bicol hale sa dating 500 na bed capacity.


‘‘Maogma na gibohon nang 1,000 an bed capacity kan BMC alagad igwang pag-iribang paghadit huli kan nadiscobreng depekto sa elevator asin iba pang problema na kaipuhan an rectification sa edificio’’, sabi pa ni Clavecilla.


An Acta Republica 11478, bagong ley na nagduduble sa bed capacity kan hospital dakulang bagay sa padagos na nagdadakul na mga pasyente sa Bicol lalo na ngonian na may pandemya.


Si Congresista Gabriel H. Bordado Jr. kan tercer distrito kan Camarines Sur asin naging katuwang naman si Congresista LRay Villafuerte kan segundo distrito nganing maaprobar an bill sa Camara-Baja.


Inomaw ni Clavecilla an duwang lihislador kan Camarines Sur sa kaisipan para sa dugang na bed capacity kan hospital mantang igwa man sanang duwang dakulang mga edificio.


Sinda Senador Kiko Pangilinan asin Bong Go iyo man an nagpadreno kan bill sa senado. (dpa)

Share on Facebook
Share on Twitter
Please reload