PUJs hagad tawan subsidiya sa crudo kan manga LGU

August 1, 2020

Ciudad nin Legazpi – An sektor nin transporte sa Bicol hinahagad sa mga lokal na gobierno na dapat i-adaptar man an subsidiya sa crudo aroaldaw sa mga pampasajerong PUJs kan duwang LGU sa Albay asin an Capitolyo Provincial kan Sorsogon.


Kun naitatao an subsidiya sa crudo aroaldaw  sa PUJs kan ibang LGUs ano ta dai kayahon kan kadakle sa mga lokal na gobierno sa Camarines Sur, Camarines Norte, Masbate asin Catanduanes.


Si Ramon Rescovilla, regional chairman kan Condor-Piston Bicol nag-apelo sa mga LGU sa Bicol na tabangan an mga nagtitios na mga tsuper nin jeepney sa paagi kan ayuda sa pang crudo sa aroaldaw na pagkayod mientras na kulang an saindang pasajeros huli ta limitado sana sa cincuenta por ciento an dapat palunadon mientras na estrictong pinapasunod an ‘‘social distancing’’.


An mga LGU kan Sto Domingo asin Tiwi sa provincia nin Albay asin an gobierno provincial kan Sorsogon igwang alokasyon sa mga nagkakayod na jeepneys aroaldaw.


Katuyohan kan LGUs na matabangan sinda mientras na halangkaw na an 300 pesos nindang naipupuli sa familia sa maghapon na pagpasada  sa saindang mga kanya-kanyang ruta.


Sinabi ni Rescovilla an LGUs kan Sto Domingo, Albay sa 80 unit nin PUJs na igwang franquicia sa LTFRB alagad 42 sana an igwang special permit  iyo an saindang natatawan nin sustento sa crudo aroaldaw na nagcancantidad nin P500.


Sa banwaan nin Tiwi, Albay na igwang 60 unit nin PUJs na igwang franquicia kan LTFRB alagad 30 unit sana an natawan nin special permit iyo an natatawan nin P500 para sa aroaldaw na pagkayod.


Sa provincia nin Sorsogon na igwang maabot sa 700 na unit nin PUJs alagad 210 sana digdi na may special permit iyo an natatawan nin ayuda kan Capitolyo Provincial.


Dating nagtataong P500 an LGU kan provincia alagad nagabatan sa tinataong ayuda envez ginibo na sanang P200 aroaldaw, sabi pa kan Condor-Piston.


Sinabi pa ni Rescovilla, dapat magkasararo an federasyon kan PUJs sa kanya-kanyang provincia nganing hagadon an tabang kan LGUs na matawan man sinda nin subsidiya sa crudo aroaldaw na kinayang gibohon kan ibang LGUs sa Albay asin kan Sorsogon. (dpa)

Share on Facebook
Share on Twitter
Please reload