Patanid contra sa Casureco II, Telcos pinadara na kan PNR

August 1, 2020

‘‘Last and final warning’’ kan Philippine National Railways (PNR) sa  duwang telephone company asin cooperativa nin electricidad an pinadarang surat na dapat  ibugtak sa tamang lugar an saindang mga linya nin kuryente asin kable na bakong delicado sa aksidente sa nagdadalagan na train.


Ini an kumfirmasyo sa entrevista kan Bicol Mail sa paagi nin telepono ki Division Manager Gregorio Maño kan PNR Bicol na saiyang piglinaw dai pa muna sinda masangat nin caso envez pinadarahan nin noticia na nagpapatanid sa Camarines Sur II Electric Cooperative (Casureco II),  PLDT asin Converge.


Magigirumduman kan Hunyo 22 na banggui mantang nagdadalagan an PNR train viajeng Camarines Sur asin Albay haling Manila lunad nin mga Locally Stranded Individuals hale sa Metro Manila nasabitan an mga naglalaylay na mga kable kan Telcos asin kan Casureco II na enterong naguyod sagcod nagkaturomba an pitong poste na naging causa nin duwang aldaw na kawaran nin suplay nin kuryente sa Greenland, Concepcion Pequeña mantang natuklab man si takop kan aircondition kan nagdadalagan na train.


Kun nadisgracia  na nagdukot si livewire sa atop kan train delicado sa aksidente sa mga pasajeros, sabi pa ni Mano.


Kabale sa dapat sunodon kan Casureco II magsunod  sa tamang horizontal clearance sa quince metros na sakop na lote kan perokarril asin an tahaw na 7.5 metros mantang kaipuhan ibalyo na an presenting mga poste sa tamang sukol na pigmamando kan PNR.


Kinakaipuhan 15 feet an langkaw kan mga secondary asin primary lines kan Casureco II asin kable kan Telcos  asin Cable TV maghale sa relis kan perrokaril nganing dai na abuton kan nagdadalagan na train sagcod naibitaran an aksidente. 


Sinabi pa na nagsimbag na an Telcos asin Casureco II na masunod sinda sa pigmamando kan manijamiento kan PNR.


Piglinaw pa ni Mano na dai man sinda nagcocontra na agihan kan mga linya kan cooperativa asin Telcos an itaas nindang lugar huli ta parte ini kan pag-asenso kan sarong lugar alagad ipatama sana.


Sa lado kan Casureco II, sinabi kan saindang opisyal na parataram Rinner Bucay na pinapaadalan na kan manijamiento sa saindang legal counsel kun dapat sangatan nin caso an ilegal na nagkabit nin mga kable sa saindang mga poste.   

Share on Facebook
Share on Twitter
Please reload